(NLTimes) – E agencia encarga cu studielening na Hulanda, DUO, lo blokia e peticion pa renova paspoort di ex-studiantenan cu no a cumpli cu nan pago.

Esaki ta pasa ora cu e agencia no por mantene e contacto cu e ex studiantenan den debe. Durante e aña pasa, mas di 2,700 persona Hulandes bibando den exterior no por a renoba nan paspoort como resultado di esaki, cual hopi biaha ta causa consecuencianan significante, Trouw a reporta.

DUO tin speransa di forsa e studiantenan aki tuma contacto pa asina nan por yega na un areglo di pago. Tin mas o menos 100,000 ex studiante Hulandes cu debe di studielening cu actualmente ta biba fuera di e pais y di ken DUO no tin detaye pa tuma contacto cu nan. Mas o menos 80 porciento di e grupo aki te ainda no a cumpli cu pago, DUO a splica e corant. Si e atraso ta mas grandi cu 5,000 euro, DUO ta blokia e renobacion di nan paspoort. Hulandesnan afecta por renoba nan paspoort solamente despues cu nan yega un acuerdo cu DUO.

Varios Hulandes afecta a conta Trouw cu e sistema aki no ta proporciona. Un ex studiante bibando na Austria a perde su trabao pa motibo cu e no por a renova su paspoort. Otro na Argentina no por a aplica pa residencia pa motibo cu e no tin su paspoort y pa motibo aki no tin acceso na medicamentonan vital.

Ex studiantenan a bisa cu nan falta di pago ta un formalidad. Nan ta den atraso pa motibo cu nan no a declara un entrada na DUO. Si nan lo a haci esaki, nan no lo mester a paga nada pa motibo cu nan entrada ta bao di e limite pa un pago.

Segun DUO, e ta e responsabilidad di e studiantenan aki pa declara nan entrada y maneha e areglo di pago di nan debe. “Nos ta usa e paspoort como e señal pa reestablece e contact cu e personanan cu debe den gran atraso,” vocero Bert Viel a splica. “Si un persona indica cu nan no por paga, nos ta haci un areglo cu ta apropia pa e persona su situacion personal.”

DUO a admiti cu e paspoort ta un manera di pone presion riba e personanan cu por paga e debe pero no kier haci esaki. “Sinembargo den e situacionnan aki, e persona conscientemente ta evadi e obligacion di paga, y e ta un medida proporcional.”

E uso di paspoort di e manera aki ta legal, sinembargo e Ombudsman Nacional ta critico di e sistema. E ta compronde e uso di esaki pa restaura contacto, pero loke ta pasa despues mester ta specifico pa cada persona, Ombudsman Nacional Reinier van Zutphen a bisa. “Bo no por forsa pago si e studiante no por cubri esaki. Si bo blokia un persona su paspoort, rapidamente e ta bira inapropia pa motibo cu nan por sufri consecuencianan enorme den nan bida social of trabao.”

DUO ta trahando rbia mehora e Person-Oriented Collection Program y mehora e comunicacion pa evita cu e studiantenan ta keda atras cu nan pago. E servicio a enfatisa cu ta solamente un grupo chikito di ex studiante ta enfrenta e medida aki.