Ludwich Samson:

Ludwich Samson, chef y doño na su propio restaurant(nan) ta conta Bon Dia cu en berdad ta haci falta di iniciativa pa cultivacion di nos mesun cuminda na Aruba, cual ta algo cu e mes ta pensando pa tuma iniciativa den dje.

Sr. Samson ta bisa cu na Aruba nos no ta produci casi nada di cuminda y por mira ultimamente con vunerabel realmente nos ta den e parti aki. “Un rato Venezuela a cera frontera y ningun hende tin awacati mas, ni banana banda di cuminda mas, anto bo sa, tin yen cos pasando den mundo tiki straño y sin cu nos sa nos por keda sin nada.” Sr. Samson ta bisa cu tin potencial pa planta akinan pero esaki lamentablemente nunca a wordo stimula. “Gobiernonan no a pusha pa hacie tampoco. Na luga di nan pusha pa nos agricultura local, nan a bay haci tratonan otro camindanan pa bin cu cos di afo. Na luga di inverti den nos cunukeronan, duna nan subsidio di awa. Nan a laga nan muri seca paso awa no ta yobe”, e ta bisa.

Na Hulanda por ehempel e luga cu mas tin problema cu temperatura/clima na mundo y ta esunnan cu ta produci mas berdura/fruta bon y bunita. Nos cu tin e clima na nos fabor, nos no ta haci nada cu esaki segun sr. Samson. E ta bisa cu mester cuminsa educa prome pa nos cuminsa yega unda nos tin cu yega. E ta bisa cu e ta mas cu un negoshi pasobra su restaurant mes ta duna varios hende cos por nada, djis pasobra e ta e manera cu nan ta traha. “E ta great cu nos ta gana placa cu esaki pero bo ta wak hopi hende den necesidad, hende cu no ta educa. Hende cu tin cancer y nan specialista mes no ta educa nan. Nan ta bin cerca nos y nan no sa kico pa haci.”

Cuminda ‘clean’
Sr. Samson a verdiep su mes seis aña pasa caba den un concepto yama ‘low glycemic’ cual ta cumindanan balansa, substituyendo tur e ingredientenan malo cu hende ta custumbra di come pa loke ta bon. Y asina bo ta come cuminda dushi toch pero bon balansa. Bo ta practicamente riba un dieet sin cu bo sa, dunando bo curpa tur e nutricion cu e mester. Bo ta haya energia tambe pasobra bo ta comiendo bon. E ta un concepto saludabel cu nan ta uza hopi pa hende diabetico y otro malesanan. Nan ta reemplasa aros blanco pa whole grains, pastanan, batata ta cambia pa batata dushi.

“Mi a cuminsa siña traha cu caloria y drenta den e mundo di prepara cuminda pa bodybuilders. Y asina den e añanan mi a gana experiencia den e parti ey di cuminda fuera di loke mi ta haci pa catering”, segun sr. Samson.