Falta di confiansa di consumidor tabata promer cu coronacrisis

E Consumer Confidence Survey di Banco Central pa e promer kwartaal di 2020, publica luna pasa, tabata indica, igual cu e Business Perception Survey recientemente, un caida bastante serio den confianza di e consumidor den e situacion di e momento ey. Esaki a causa tambe di cambio den demanda pa prestamo den sector bancario, loke ta resulta den e articulo acompañante di e situacion economico segun Bankers’ Association.

E Index di confianza a cay di 97 na ultimo trimester di 2018 te na e punto historico di 91.7 na 2020. Mester observa si cu e Index, den cual unscore di 100 ta neutral y bao di 100 ta negativo, tabata bao 100 pa henter 2018 y 2019 caba. E crisis di coronavirus a bin empeora esaki.

E preocupacion di e consumidor tabatin di haci cu ‘condicion economico’, ‘posicion financiero di gobierno’, ‘inseguridad di trabao’, situacion financiero di hogar’ y ‘salud personal’.

66% di e encuestadonan a indica cu e crisis di Covid-19 lo tabatin un impacto severo riba nan posicion financiero pa loke ta nan hogar. Tambe 48% di e encuestadonan tabata anticipa cu e crisis di Covid-19 lo dura varios luna.Tambe nan expectativa pa loke ta e proximo seis lunanan compara cu e anterior 6 luna ta mas negativo, pa tur item, manera haya trabao, posicion financiero di gobierno, etc.

En general un gran mayoria no tabata haya apropia pa bay den gasto o prestamo na e momento aki. Excepcion, no remarcable, den esaki ta pa prestamo hipotecario, pa cual si a continua animo, naturalmente pa e minoria ta den capacidad pa maneha esaki, specificamente esnan cu tin mas entrada y mas seguridad di trabao.

Esaki por mira refleha tambe den e cifranan di Banco Central pa loke ta prestamo na individuo, unda por mira un caida den prestamo na consumidor, compara cu e promer kwartaal di 2019, mientras cu prestamo pa hipoteca a keda crece, hasta te den luna di maart 2020. (Table 1, Monetary Survey; Statistical Tables March 20).

No ta premira cambio den e tendencianan negativo aki, a menos cu bin un cambio den e situacion actual, cu un apertura diligente di economia. Asina mes e caida den recurso financiero pa parti considerable di nos poblacion ta mantene poder di compra fuertemente reduci.