Esaki sinembargo cu malcontento di parti di e negoshantenan di kiosco cu no a haya ningun aviso cu lo bay haci un cambio. Ora Bon Dia a presenta na e sitio tabata tin te hasta polis na e sitio, un grupo di negoshante tabata papiando cu polis riba e situacion cu tabata aparenta di pone restriccion riba nan pa loke ta trata luga di parkeer. Loke hopi di nan a expresa ta cu na ningun momento e departamento a informa nan cu lo bay kita e posibilidad pa parkeer banda di e kiosconan. Apart di mester paga huur cual pa un par di negoshante manera Trudy Lampe ta cay pisa ora benta no ta bay di manera optimal, e situacion di parkeer ta dificil.
Negoshante Virgil di su banda a expresa cu si ta bay kita e posibilidad pa parkeer na e espacio habri banda di e kiosconan, aunke sea mester por regel un manera pa e negoshantenan por parkeer. E situacion tabata tenso, nos a compronde for di sra. Lampe prome cu nos a presenta pasobra no tabata sigur kico tur e trahadonan di DOW lo bay haci na Welcome Plaza. Sra. Lampe mes a expresa cu no tin problema cu e trahadonan, pero si haci algo ‘aunke sea por comunica esaki’. Loke tabata parce un mal entendimento pa via di mal comunicacion di parti di instancianan, a resulta den un problema cu tabatin unda personanan tabata parkeer mucho cerca di e rails na cant’i caminda, cual tabata restringi e paso di e tram.
Asina polis tabata conta sra. Lampe, cu na varios ocasion polis mester a interveni pa move autonan cu tabata parkeer mucho cerca di e rails. Na yegada DOW a obliga un auto pa move pa asina rondona e parkeerplaats cu baricada. Nos a acerca director di DOW Marlon Croes pa comentario pero nos no a haya un reaccion. Mientrastanto manera nos a publica den pasado, e negoshantenan di kiosco hopi biaha ta haya benta abou y mester paga huur di e kiosconan nobo, cual no tabata necesario den ora e kiosconan tabata panort.
