ORANJESTAD – Den e dianan aki Bon Dia Aruba a haya notificacion di varios usuario di credit card, entre nan comerciante, cu nan a haya nan confronta cu credit card ‘comprometi’ es decir posiblemente ‘hacked’ pa otro persona. Nan a haya un notificacion di banco cu nan lo mester warda un credit card nobo.

Bon Dia Aruba a tuma contacto cu sr Elvin Maduro cu ta presidente di e Asociacion di Banconan di Aruba ABA) pa averigua esaki. No por a haya un confirmacion si tin un aumento di e cantidad di caso di fraude cu credit card actualmente. Maduro en todo caso no tin conocemento di un situacion asina na Aruba. Loke si e por a duna ta e recomendacionnan en general con un cliente por actua pa sea preveni, o pa logra resolve e problema ora ta trata di (posibel) caso di fraude cu credit card. Ora un persona ta cumpra riba un pagina di internet y ta sospecha cu tin algo cu a bay robes, loke e cliente mester haci semper ta pa laga su banco sa di inmediato, pa cambia e credit card.

Por ehempel na Banco di Caribe, unda Maduro ta gerente, e cliente por pidi e opcion pa un ‘SMS’ como confirmacion pa cada biaha cu e cliente usa su credit card. Asina e persona por ta mas safe, specialmente den e caso cu un persona ta por ehempel na Aruba y nan ta haya un sms cu nan credit card a ser usa na e momento ey na un tienda na Miami. Den un caso asina e cliente mester yama di biaha su banco pa laga blokea credit card mesora.

Tambe si e persona ta sospecha cu su credit card ta ‘compromised’, pa usa e termino bancario, e cliente mester bay banco pa cambia e tarheta.

Sr Maduro a duna como conseho tambe pa tur cliente cu tin credit card, pa ta cuidadoso ora nan ta paga, por ehempel den un restaurant, pa paga tino con ta maneha e credit card, mester percura pa bo mes ta presente ora ta usa e credit card na un mashin.

Casi tur banco na Aruba tin actualmente credit card cu chip, esey ta significa cu e cliente mester pone su PIN, pero tambe ta existi mashin cu ta swipe y no mester di e PIN. E cliente mester ta atento di ki movemento nan ta haci cu su tarheta; Maduro ta recomenda na tur cliente pa semper percura pa ningun hende haya nan PIN y no duna ningun hende tampoco.

A continuacion varios tip of recomendacion di siguridad y prevencion pa persona cu tin credit card y no kier bira victima di fraude:

Semper hiba den bo telefon of anota e number di acceso 24 ora di bo banco, pa cu mas facilidad por notifica e perdida di credit card desde e prome momento cu el a perde; ta miho pa solicita otro tarheta pa no duna tempo na otro persona pa haci fraude cune.

No anota e number di PIN den mesun cartera unda ta warda bo tarhetanan.

Si bo ricibi un yamada telefonico of un e-mail, aunke e persona lo identifica su mes como empleado di banco, nunca duna ningun tipo di informacion personal y mucho menos e PIN.

Ta existi “Fraud Proteccion” un seguro unda e persona ta paga un suma chikito pa tin mas proteccion di su credit card.