ORANJESTAD – Recientemente, organisadonan di e evento popular Aruba Beach Tennis a revela cu e aña aki, e evento lo muda di Eagle Beach pa Bushiri, locual a lanta hopi curiosidad den comunidad. Sinembargo, tabata e revelacion di minister di Infrastructura, cu gobierno lo drecha e area pa por realisa e evento aki, cu realmente a causa preocupacion.
E evento di Aruba Beach Tennis ta uno hopi popular, y ya pa varios aña ta asocia cu e area di Eagle Beach. Sinembargo, dos desaroyo nobo a causa cu minister di Infrastructura, Otmar Oduber, no a permiti pa e evento tuma luga na Eagle Beach un biaha mas e aña aki. E prome tabata cu, segun informacion di otro medionan di comunicacion, durante e ultimo edicion di e evento, no a cumpli cu art. 25 di nos Decreto Nacional Playanan y Costanan Publico, specificamente, door di permiti vehiculonan di motor subi riba e beach.
E di dos ta cu e status di Eagle Beach a subi, door cu el a wordo nombra un di e miho beachnan di mundo, pa cual motibo no por permiti un tipo di evento asina riba e beach aki mas, mirando su escala.
Mirando e comentarionan di e organisado di Aruba Beach Tennis, Sjoerd de Vries, kende den un articulo di Awe Mainta su edicion dia 6 di februari, a bisa cu e area di Bushiri no ta adecua pa e evento, pasobra ‘e no ta un evento cu por wordo organisa riba un parkinglot, y ta p’esey e yama Beach Tennis’, gobierno a aclaria cu lo percura pa e tereno di Bushiri ta cla na november venidero pa asina e evento di Aruba Beach Tennis por tuma luga. Segun un relato di 24ora dia 14 di februari ultimo, gobierno a declara cu ‘naturalmente tin cierto trabaonan cu tin cu haci pa asina por acomoda nan, y gobierno ta dispuesto pa haci lo posibel pa laga e luga cla’.
Bon Dia Aruba tuma contacto cu Departamento di Obra Publico, cu algun pregunta importante pa aclaria e situacion. Pakico gobierno mester drecha e tereno pa un evento priva? Pakico e patrocinio di e evento aki no a cay den presupuesto di ATA, mirando cu ta un evento anual na beneficio di nos turismo? Pakico no a acerca Fundacion Lotto Pa Deporte pa patrocina e preparacion di e tereno, mirando cu ta un evento deportivo? Bou di ki presupuesto lo drecha e tereno pa Aruba Beach Tennis? Tambe ta cuestiona na prome luga si ta posibel cu e area di Bushiri lo por keda cla pa tene un evento asina na november proximo. Ademas, minister a comenta, segun e relato di 24ora, cu e idea ta pa anualmente e evento sigui tuma luga na Bushiri. Con esaki ta fit cu e maneho di Bushiri como un playa publico pa localnan? Ademas, nos kier a haya sa ki sorto di consecuencia e organisadonan di e evento a wordo confronta cu ne despues di no a cumpli cu nos Decreto Nacional Playanan y Costanan Publico art. 25. Lamentablemente, despues di varios yamada, nos no a logra papia cu e persona concerni.
E preguntanan aki ya caba a wordo expresa cerca varios persona den nos comunidad, principalmente enfocando riba e motibo pakico un evento asina ta un prioridad pa gobierno, particularmente mirando e situacion dificil di presupuesto di gobierno, unda cada florin mester wordo gasta cautelosamente. Mirando cu gobierno y e organisadonan di Aruba Beach Tennis ainda ta den palabracion pa yega na un solucion, ta spera cu lo aclaria e puntonan aki prome cu sigui cu e evento.
