No tin informacion oficial for di gobierno, Utilities N.V, y Refineria di Aruba (RdA), tocante e situacion actual di e terminal y refineria. Pero tambe di e trahadonan y nan status cu a keda pa opera e infrastructura aki, despues cu Citgo a yega finalmente cu un pakete di retiro satisfactorio pa e trahadonan.

Esun cu a bin cu cierto informacion riba e asunto aki tabata ex minister di Energia y parlamentario di oposicion, Mike de Meza, kende no solamente ta alerta riba un peliger evidente den e refineria, sino tambe cu el a laga sa cu grupo di 15 trahado a keda pa atende e terminal di combustibel.

Grupo di trahado.
Referiendo na e asunto aki presidente di FTA, Hubert Dirksz, a bisa cu di e 73 trahadonan cu a resta, nan sindicato tabatin 28 trahadonan di staf, caminda 8 di nan a keda trahado ainda pa atende cu e terminal.

Awor cu nan tin un ocupacion minimo di 15 trahado so pa haci lo minimo den terminal, specialmente pa atende e barconan cu ta drenta pa abastece nos pais di combustibel. E no sa precies si realmente ta 15, ya cu e por ta uno menos of uno mas acerca.

FTA su posicion tabata pa no solamente e trahadonan haya un bon pakete di retiro, sino pa percura cu mas hende por keda na trabou y garantisa esey. E sindicalista Dirksz a bisa cu berdaderamente nan a bringa pa mas persona por a keda. Pero ta resulta cu for di comienso caba, ora cu nan a yega di sinta cu RdA, nan por a constata cu no por a keda cu hopi hende.

Nan a haci calculacion di cuanto hende lo por keda pa por garantisa operacion di e terminal y siguridad di e compleho aki, y nan a yega na un cifra entre 40 pa 45 hende. Pero ora cu nan a sinta un biaha mas cu gobierno, RdA y Utilities, presidente di hunta di comisario di Utilities, Richard Eman a papia di 10 hende so, segun presidente di FTA. E trahado a haya esey masha ridiculo, pasobra no por bay cu 10 hende -segun presidente di FTA- pa atende cu un compleho asina.

Pakete di retiro.
Igualmente presidente di FTA a bisa na e matutino aki cu ainda nan tabata bezig cu e re calculacion di e pakete final di retiro cu Citgo Aruba Refinery (CAR) a ofrece na e trahadonan, y cu nan a acepta tambe.

El a referi cu na december e compania a yega di ofrece un pakete di retiro cu e pago minimo, entre nan cesantia y dos luna y mey ‘court time’ y pre-aviso tambe, locual mayoria di e trahadonan a rechas’e. Finalmente despues di varios maniobra y intento PDV Holding -cu ta e compania madre di CAR- a bin cu placa adicional pa por a paga e trahadonan un pakete di retiro mas husto. Pero despues a bin resulta cu ora e oferta aki a bin preto ariba blanco, nan a laga e dos luna y mey di ‘court time’ afo.

Dirksz a splica cu esey a haci cu e sindicatonan representando e trahadonan a bin na mesa atrobe, unda a dicidi laga cay e ‘court time’, pero CAR mester a bin cu un suma di 12 mil florin pa cada trahando kitando e pre-aviso. Esaki a keda acepta y firma pa keda cla cu e trahadonan nan pakete di retiro.

Pa e trahadonan cu ta pensionado y pa esunnan cu ta mas hoben, nan a dicidi di duna nan e dos y mey di ‘court time’ y tambe duna nan un pre-aviso, teniendo cuenta cu nan añanan di servicio. El a splica cu asina finalmente nan por a keda cla cu e re calculacion di e pakete final di retiro.