Ayera tardi presidente di ATIA, Ronald van Trigt a reuni cu representante di Astec pa canalisa e preocupacion di comercio cu e incidente di e barco di container cu no por baha nan carga diaranson ultimo den waf na Barcadera y mester a wordo manda pa Corsou, te cu diasabra cu finalmente por a drenta nos waf di container. Esaki a trece un tardansa di tres dia cu tin su consecuencia, vooral den temporada crucial aki pa comercio, segun sr. van Trigt.
Despues di e reunion, sr. van Trigt a declara na Bon Dia Aruba cu locual tabata importante ta cu nan a papia cu gerencia di Astec pa haya clarificacion. El a bisa cu e clarificacion cu Astec a duna tabata extenso y e tabata basa ariba ‘cierto echonan cu por mustra nos’. Esey ta pone cu nan por conclui cu ‘Astec no tabata e partido di culpa den esaki’, segun presidente di ATIA.
Den nan combersacion nan por a conclui cu tabata mas tanto asunto di mal comunicacion. “Comunicacion cu no tabata completamente cla”, el a bisa. Pero no solamente comunicacion cu no tabata completamente cla, sino cu tampoco no tabata corecto. ATIA ta bay combersa cu tur e otro partidonan envolvi den e caso aki pa asina defende comercio miho y obtene mas informacion pa nan por evita un incidente similar.
E ta kere cu nan mester cuminsa comunica mas tempran den e proceso di bahamento di carga, muy specialmente den e luna aki di december, pero tambe den otro temporadanan cu Aruba sa di ta mas druk. Pues ATIA ta considera cu mester habri un linea di comunicacion cu mas partnernan pa asina evita locual a pasa siman pasa.
