E reglanan di e prome debate di eleccion organisa pa Camara di Comercio ayera a stroba cu por tuma un debate real entre e 7 partido politiconan. Solamente na final ora e politiconan por contesta preguntanan di publico, por a mira un poco discusion. Lider di RED Ricardo Croes a resalta, segun comentarionan.

E 8 pregunta prepara cada un acompaña cu un texto di introduccion di e topico, tabata largo y varios biaha complica. Siguramente cu e tempo limita di contesta. E formula pa dividi e preguntanan aki den 3 tanda unda tambe a limita e cantidad di partidonan pa contesta, no a funciona pa crea un debate. E 30 seconde reserva pa comenta riba otro tambe tabata mucho limita y asina corta casi cada discusion.

Remarcabel tambe tabata cu den tandanan, cual a tuma mayoria tempo, topiconan dominando bou publico manera criminalidad no a wordo atende. Tabata na final atrobe ora a cuminsa trata e preguntanan di publico, cu e topico aki a bin dilanti. Unda por mira cu e partidonan a keda draai den e mesun solucion di mas polis riba caya y mas inversion den tecnologico. Mientrastanto no a atende cu e causanan principal di mayoria di crimen: e mesun grupo di ladron cu ta keda cera pa termino cortico pa ora di sali ta cay bek den criminalidad; hoben den man di gang y aumento di arma di candela.

Corupcion y punta dede
Un otro momento remarcabel tambe a sosode na final di e debate, ora lider di PPA Benny Nisbet, cu henter anochi tabata fuerte den su palabra y acusacion di e gobernantenan actual y di pasado, a toca e punto di integridad den gobierno. Aki el a  menciona e investigacion di corupcion unda ya un ‘minister mester a baha’ y segun sr. Nisbet ‘mas investigacion lo sigui’, unda el a punta dede pa minister Benny Sevinger di Infrastructura cu tabata sinta den sala.

Lider di RED, sr. Croes a continua riba e punto aki, declarando cu integridad y transparencia no ta existi den e diccionario di niun cu a goberna Aruba te awor. “Sorry mi man ta bay eynan tambe”, e politico ta bisa, punta dede atrobe na minister Sevinger.

Riba e punto aki prome minister Mike Eman a defende cu persecucion no ta afecta politica so pero ta trece ‘daño na imago di Aruba’. Y e ta recorda tambe ora Otmar Oduber tabata e ‘victima inocente’ di persecucion. Un remarca cu no ta parce asina inocente mirando cu sr. Oduber awor como lider di POR mes a trece documentonan den publicidad riba supuestamente corupcion cu tereno

Segun comentarionan mas tanto online por mira tambe cu lidernan di AVP, MEP y PPA  no a trece mucho novedad den e debate. Sr Oduber di POR si a trece un mensahe cla dilanti, siguramente ora di papia entre otro di busca un solucion pa dump Parkietenbos awor, den un forma cu e mes a haci turismo (ATA como sui generis) y aviacion (Ansa), formando instancianan cu fondonan pa atende e asuntonan.

Aunke MAS y tambe UPP tabatin nan puntonan, di un of otro forma nan no a logra di trece nan mensahe asina cla pa dilanti cu e otro partidonan. Sinembargo e gran perdedo di ayera nochi dilanti un sala yen tabata e debate publico of miho bisa e falta di debate publico. Ya hopi trempan un imagen di un señora cu a pega soño den sala y cu e cameraman di Telearuba a capta, a bira un meme viral riba social media. Esaki a vocifera e opinion di hopi hende cu tabata sigui e programa na cas.

Pero tin un chens ainda pa KvK riba 17 di augustus unda nan lo organisa e di dos debate di eleccion.