Falsificadonan di productonan ta hendenan cu ta specialisa cada biaha mas

Asociacion Interamericano di Propiedad Intelectual (ASIPI) a scoge Aruba pa realisa su seminario internacional Contra Falsificacion.

Durante un entrevista cu Bon Dia Aruba, president di ASIPI, sra. Maria del Pilar Troncoso a bisa cu nan ta un asociacion cu ta uni principalmente e profesionalnan tanto di Latino America, Nort America y paisnan Europeo, pero tambe di Africa y Asia.

Aruba

Nan ta purba di bay diferente pais pa organisa nan eventonan, ya cu e idea tras di esaki ta promove e proteccion riba propiedad  intelectual mundialmente.  Nan ta scoge nan sede di nan evento mayoria di biaha pa e area geografico y interes di e pais anfitrion  y esaki tabata e caso di Aruba.  

Otro aspecto cu a hunga un rol tin di haber cu e interes cu un tema specifico manera contra e falsificacion di productonan ta lanta. Den e caso aki Aruba a wordo scogi dor di comite ehecutivo danki na un proposicion cu director di Oficina di Propiedad Intelectual di Aruba, sr. Gos Oduber a realisa cerca nan.

“Nos a considera e proposicion aki como algo bon pasobra nunca nos no a yega bin Aruba”, el a bisa.  E ta haya cu riba e topico di falsificacion di productonan, Aruba cu ta un isla cu lo por sirbi di brug pa e traficacion di falsificacion. P’esey, ASIPI a haya cu e topico aki tabata uno adecua pa tuma luga den nos pais.

Sra. Troncoso a laga sa cu e problematica di falsificacion y traficacion di producto no original den nos region ta considerabel, pero e ta indica cu esaki ta un problematica na nivel mundial tambe. 

“E ta un problematica caminda tras di dje ta opera e crimen organisa, tambe labamento di placa,  y ta existi otro delitonan, incluso mas grandi rond di e falsificacion”, el a bisa.

Crimen organisa

El a referi cu den varios pais di Latino America a wordo descubri cantidad di laboratorio cu ta produci remedinan  falsifica. Tambe nan ta fabrica e etiketnan di productonan falsifica. Nan no solamente ta consumido sino cu nan ta produci falsificacion.

Falta di legislacion, falta di control y falta di conscientisacion di e consumidonan ta factornan cu ta hunga un rol importante y tin su influencia den e actividad ilegal aki. Un situacion tin di haber directamente cu e consumido mes, ya cu hopi biaha nan no sa kico nan ta cumpra y nan no ta consciente tampoco. “Pero loke ta mas pio ta cu nan no ta consciente di loke ta tras di e falsificacion”, el a bisa.

E  ta haya cu e autoridadnan di cada pais ta haci nan esfuerso pa combati e fenomeno di falsificacion y tambe e doñonan di marca, pero hopi biaha nan sa cu ta tratando cu delincuentenan specialisa. “Nan ta hendenan cu ta specialisa cada biaha mas locual ta exigi hopi esfuerso, investigacion y tecnologia pa gara nan”, segun presidente di ASIPI.

Dañonan

El a indica cu e negoshi tras di e falsificacion ta ocasiona daño contra e doñonan di marca, pero di otro banda e consumidonan tambe. Pero igualmente e gobiernonan y economia di cada pais ta sufri, ya cu e productonan falsifica ta drenta sin paga belasting.  Pero nan no tin tampoco niun sorto di regulacion of control.

“Kiermen e ta un daño cu ta wordo causa dor di falsificacion na e tres nivel anterior”, segun sra. Troncoso. Tin biaha ta existi e percepcion eroneo cu e falsificacion ta afecta exclusivamente e doño di e marca, pero no ta asina ….

Un problema grandi tin di haber cu e consumidornan di producto medico falsifica, y otro productonan di consumo cu ta afecta nan salud. “E ta un problematica na nivel internacional y e Caribe no ta scapa di esaki”, el a declara.

E lucha contra e problematica no ta facil y e ta demanda hopi esfuerso, ya cu cada dia e falsificadonan ta busca via diferente y forma di falsificacion sofistica pa logra nan meta. Entre otro internet y social media a bira un plataforma cu e falsificadonan ta uzando pa promove y bende nan productonan ilegal.

“Normalmente ta mas facil pa nan, pasobra e consumido no ta wak e falsificado. Nan ta uza un serie di plataforma legal pa bende nan producto falsifica…”, presidente di ASIPI a bisa na Bon Dia Aruba.

Na final, presidente ASIPI a expresa su palabra di danki na e autoridadnan local cu a ricibi nan pa realisa nan seminario riba e “bunita isla” aki.