Diasabra anochi a cuminsa e temporada di Carnaval na Aruba unda Fakkel of Parada di Flambeau a tuma luga cu e participacion di 9 grupo den cual algun di nan a haya cierto contratiempo loke a causa cu e yegada programa primeramente pa 12or di anochi a bira pa casi 3or di marduga.
TOB Carnival Group, Champagne Carnival Group, Don Flip Carnival Group, Infinity Carnival Group, OPC Carnival Group, Empire Carnival Group, Dushi Carnival Group, Royal Carnival Group y Los Laga Bai tabata e gruponan presente cu a pone ambiente na e prome celebracion.
Durante e actividad aki por a mira cu algun medionan di comunicacion a informa cu e parada mes a stop debi cu Cuerpo Policial tabata bezig controlando e trucknan di e diferente grupo participante como trakker of barnan pa wak si nan tabata na ordo na unda a bira conoci cu “mayoria di grupo no tabatin ni un documento na ordo,” siendo cu esey a ser informa for di basta dia caba tanto pa tur stakeholder como pa lidernan di grupo, compania di zonido, luz, trakker, chauffeurnan, entre otro.
Algo cu a causa diferente reaccion riba social media como por ehemplo, pakico no a controla prome cu parada lo a cuminsa? of si hendenan sa cu esaki ta bay tuma luga pakico no ta tene nan papelnan na ordo? Algo cu Cuerpo di Polis mes por medio di nan vocero a sigura na Telearuba durante su transmision en vivo, cu esaki tin di haber cu siguridad, esun cu a haya e vergunning tin e responsabilidad y KPA tambe, tur hende a palabra y tur e lidernan di grupo tabata sa, nos tur ta suficiente grandi pa e proximo parada tur hende por cumpli cu e reglanan,” Liliana Rasjmin a sigura.
A parada a continua su caminda na unda e permiso tabata pa 12or pero debi na loke a sucede cu e permisonan, e parada a extende hasta casi 3or di marduga.
Parada di Flambeu a caba cu 8 detencion
Mientras tanto, Cuerpo Policial a informa mediante un comunicado pa prensa cu diasabra anochi pa exactamente 8or di anochi e parada di Flambeu a start sali for di dilanti ex-Kooyman na Avenida Milo Croes.
Cuerpo Policial conhuntamente cu SMAC y prome minister Evelyn Wever-Croes a cende e flambeu pa asina haci inicio di e parada.
Cuerpo Policial a haci un control riba e vehiculonan cu a forma parti di e parada. Aki a bin constata cu tabata tin vehiculonan cu no tabata tin e documentonan necesario. Tambe saca un UTV pa no tin documento na ordo.
A para e parada te ora a logra yega na un solucion.
Despues parada a sigui y pa 00:43am e cabes di e parada a yega ex -DOW y pa 02:58am e final a yega . Por bisa cu e aña aki e detencion a baha.
Total tabata tin detencion pa faya bo haya. E detencionnan tabata pa buracheria, bringamento, posesion droga, posesion di arma blanco y tambe insulto pa un polis. Tabata tin 2 detencion relaciona cu maltrato cu a wordo pasa pa departamento di recherche, pa loke ta trata aña 2023 e parada di Flambeu a conta cu 19 detencion.
A detene 11 chauffeur pa maneha bao influencia di alcohol
Igualmente departamento di Trafico y Unidad Motorisa a informa cu nan a haci control prome durante y despues di Parada di Flambeu.
Tambe Unidad Motorisa a bay controla na diferente partinan strategico durante parada.
Total a detene 11 chauffeur di cual 5 a perde nan rijbewijs.
Controlnan lo continua durante e siguiente paradanan di Carnaval.
Cuerpo Policial ta haci un apelacion un biaha mas pa no maneha auto bao influencia di alcohol
