FADA un biaha mas ta trece conscientisacion cu su campaña di Amigo Didi

Ayera atardi, Fundacion Anti Droga Aruba (FADA) hunto cu Fundacion Zinnia a realisa un conferencia di prensa pa duna di conoce e video clip di nan campaña Amigo Didi pa carnaval e aña aki.

Preventie Medewerker di FADA, Rulienne Arends a anuncia cu manera tur hende sa, nan ta trahando duro durante varios aña caba pa conscientisa comunidad di Aruba tocante uzo di alcohol na momento cu ta core un vehiculo.

Arends a splica cu na december ultimo nan a haci e lansamento di un video clip pa loke ta e parti di Amigo Didi y asina tambe conscientisa e hende cu ta core brommer, cu di mesun manera ta hunga un rol den trafico ora di sali, bay un trip of un fiesta.

E aña aki, un biaha mas pa temporada di carnaval Amigo Didi a bin cu un video diferente. Nan a enfoca un tiki mas riba escogencia cu e chauffeur ta bay tin na e momento, cu por ta den un parada, ta forma parti carnaval, of si ta bay wak e paradanan cu famia of amistadnan.

Asina mes, Arends a expresa cu Cuerpo di Polis ta forma un parti elemental pa loke ta e campaña di Amigo Didi.

Liliana Rasmijn, vocero di Cuerpo di Polis, a bisa cu esaki ta un parti di conscientisacion pa carnaval. Di mesun manera el a splica cu nan a sinta na mesa pa duna di parti di Cuerpo di Polis e tipnan pa e video ta mas lo realistico cu ta posibel, pa hende sa loke ta pasa despues di carnaval.

Ademas, Rasmijn a expresa cu nan tin nan unidadnan motorisa cu ta controla, manera a pasa durante Fakkel ultimo, cu e cifranan di detencion tabata di 7 chauffeur cu tabata core auto bou influencia di alcohol.

Pa e motibo aki, Rasmijn a bisa cu nan ta campaña pa cada biaha pa hendenan compronde loke un Amigo Didi ta, pero di igual manera e hende no ta tende, tambe el a informa cu den parada di blaas e control tambe a tuma luga na unda el a bisa cu 6 chauffeur a wordo deteni pa e mesun motibo, core auto bou influencia.

Rasmijn a trece dilanti cu Cuerpo di Polis ta haci tur loke ta posibel riba caminda, nan a trece di tur diferente manera dilanti y aworaki ta keda na comunidad tambe, pa den temporada di carnaval e control ta cuminsa prome, durante y despues.

“Nos no ta kita bo di bebe, loke nos ta prohibi bo ta pa bay tras di stuur”, Rasmijn a comenta. Di esaki el a menciona cu e motibo ta, cu no ta e bida di chauffeur so ta den peliger, sino tambe esunnan cu ta uza e careteranan. “Mescos cu un persona lo kier yega na su cas bon, nos tambe y nos famianan tambe kier yega cas sano y salvo”, Rasmijn a afirma.