Vaping of sigaria electronico a cuminsa bira tendencia for di algun tempo caba entre hende adulto, pero awor e fenomeno aki ta drentando den comunidad escolar, di esunnan mas hoben cu no sa kico ta su efectonan secundario.

Vaping ta e inhalacion di e vapor crea pa un sigaria electronico of otro aparato pa Vaping. Su obhetivo ta pa humamento y nan ta funciona cu bateria. Algun di nan ta yen cu un likido cu hopi biaha ta contene nicotina, saborisante y substancia kimico. E likido ta bira cayente y ta bira vapor, cu e persona ta inhala, ta p’esey cu consumi sigaria electronico ta ricibi e nomber di “Vaping” (di vapor).

Den dianan aki, a bay viral riba rednan social un video, na unda cu por mira varios mucha muhe studiante di un scol conoci na Aruba, den cual ta haci e acto aki di vaping den area di baño di scol.

Bon Dia Aruba a tuma contacto cu Rish-Ann Ammerlaan, cu ta trahado preventivo di FADA, y el a splica cu pa nan como fundacion anti-droga esaki “ta un caso di lamenta” pa wak un video asina, cu muchanan asina hoben ta haci uso di vaping. Mirando cu esaki ta un producto cu no tin hopi aña riba mercado – por lo menos 18 aña cu ta zona hopi, pero a tuma añanan pa por descubri cu ta tabaco, sigaria mes, ta causa cancer.

“Ainda no tin un prueba haci cu ta bisa kico ta e dañonan a largo plaso”, Ammerlaan a menciona. Y algun di e efectonan secundario cu esaki ta causa, loke si nan sa ta cu tin nicotina den dje, cu ta adictivo y tin efectonan riba cerebro.

Muchanan su cerebro ta hopi vulnerabel mirando cu ainda nan ta den desaroyo. Door di usa vaping ta stimula liberacion di dopamina den cerebro, e substancia cu ta haci cu un hende ta sinti bon. Y despues e curpa ta bolbe pidi pa esaki y asina ta crea e ciclo di adiccion.

Nicotina ta afecta e desaroyo cerebral y por haci mas dificil pa muchanan y hobennan por siña y concentra den nan scol. Algun di e cambionan cerebral ta permanente y por afecta e estado di animo y control di nan impulso ora nan ta bira adulto.

Otro efecto cu Ammerlaan a bisa cu a wordo descubri pa esaki ta ‘Popcorn Lung’, cu ta un tipo di bronkitis, loke ta haci mes cos cu un popcorn cu ta explota y pulmonnan ta haya buraco na diferente parti.

Vaping a wordo prohibi na Merca caba for di aña 2020, ya cu e por causa un explosion door cu e aparatonan aki ta usa cierto bateria y cierto kimiconan, esaki por explota y esey a pasa caba na Merca.

Administracion di Alimento y Medicamento (FDA) di Merca a duna un orden pa companianan encarga di fabrica e artefactonan aki pa detene su distribucion y asina mes preveni e acceso di dje pa muchanan menor di edad pa e producto aki.

Esaki tabata pa via cu nan a haya un aumento hopi lihe di su consumo entre adolescentenan y e desaroyo di un enfermedad mortal na pulmon cu tin relacion cu e producto aki, cu a provoca casi un centenar di morto na e pais ey.

Den un rapport publica pa e revista cientifico ‘Pediatrics’ investigadonan a haya cu na 2014 personanan entre 12 pa 24 aña cu tabata usa Vaping tabatin tres biaha mas probabilidad di bira un humado di sigaria na futuro, entre esunnan cu a informa cu tabata usa tabaco, e uso diario a aumenta den edad te cu 28 aña.

Tambe, Ammerlaan a bisa cu aworaki esaki ta un tendencia cu ta wordo haya no na tur scol pero si na algun di nan, nan ta hayando casonan caminda cu docente ta gara studiantenan cu vaping den baño na scol, incluyendo scolnan basico no solamente secundario na unda ta wordo haya e aparato mes di Vaping of e likido.

Ammerlaan a indica tambe cu docente ta yama na FADA pa puntra nan kico e aparato ey ta of si nan tin un conocemento di dje cu ta resulta e “famoso Vaping”.

“Esaki no ta algo nobo pero si nos por ripara cu e ta birando un problema mas grandi” na unda cu pa hopi biaha e muchanan no ta usa vaping pa motibo cu nan tin gana di huma nicotina, nan ta hum’e pa via cu nan ta wak hende cu ta haci’e y no solamente hende rond di nan, pero rednan social ta haci hopi propaganda pa e tipo di aparatonan aki.

E propaganda aki ta wordo haci di tal forma cu e hoben ta hayando gana di usa esaki, Vaping tin mas o menos 8.000 tipo di sabor y algun di nan tin un smaak cu ta trapa e hobennan cu ta pensa cu esaki no tin ningun daño compara por ehemplo si nan ta cumpra un sigaria di algun marca reconoci.

“Un sigaria ta mas marga y nan no ta bay huma asina lihe compara cu un vaping” Ammerlaan a comenta.

Algun di e aparatonan aki ta parce un USB y e persona mes por conect’e den su computer, pa motibo cu ta genera menos shinishi compara cu otro sigaria, aunke muchanan mes no haci uso di dje tur dia e manera con nan por bira adicto p’e ta varia.

Ammerlaan a bisa cu nan como fundacion FADA ta duna tur tipo di informacion na tur scol y tur aña nan ta zorg pa manda nan lista di charla y lista di informacion pa nan duna na scolnan y e ta keda semper na scol pa invita FADA y asina ey nan por asisti y educa e hobennan riba e topiconan aki.