Ayera mainta, Fundacion Anti Droga Aruba (FADA) a duna un conferencia di prensa pa informa comunidad cu nan campaña di conscientisacion yama “Amigo DIDI” a cuminsa.

Asina a duna di conoce Rish-Ann Ammerlaan trahado preventivo na unda cu el splica cu Amigo DIDI ta un campaña cu ya caba tin cinco aña di existencia caminda cu nan ta traha cu diferente contenido y diferente informacion pa asina por conscientisa comunidad di Aruba riba ora un persona ta maneha auto riba influencia di alcohol.

E campaña aki ta pa e luna di september na unda cu via nan Facebook Page e persona por tin interaccion cu e post referi na Amigo DIDI y asina gana premionan.

“E meta di e campaña aki ta pa nos yega mas cerca di e comunidad”, asina mes Ammerlaan a detaya cu e video cu ta riba Facebook a wordo traha pa e team di FADA hunto cu Fundacion Zinnia na unda cu e dos team di e fundacionnan a sali riba caya y entrevista e comunidad pa puntra nan si nan sa kico ta Amigo DIDI.

Segun loke el a indica, hopi hende no sa kico ta Amigo DIDI ainda y nan obhetivo ta pa comunidad di Aruba conoce kico ta un Amigo DIDI y asina crea un ‘mindswitch’ den personanan cu ora nan ta bay di fiesta of celebracion cu ta inclui bebemento di alcohol of manera ta wordo bisa ‘dal bay drinks’, nan mester tin un persona cu lo por yudel’e pa maneha nan auto ora nan lo bay cas y asina evita accidente.

Di mesun manera, Ammerlaan a indica cu parti di e comunidad ta consciente kico ta Amigo DIDI pero no na e manera cu nan kier, el a sigura cu nan ta full activo den henter aña cu e campaña aki vooral den temporada di carnaval of Pasco pero cu ultimamente accidentenan di auto cu personanan bao influencia di alcohol ta algo cu ta tumando luga constantemente y nan kier implement’e ainda mas durante full e aña.

“Tin hopi accidente cu ultimamente ta pasando y e mayoria ta cu drunk drivers”, Ammerlaan a sigura.

Michella Croes di Fundacion Zinnia a trece dilanti cu e dos fundacion ta traha hunto pa asina conscientisa e pueblo di Aruba di con importante ta pa tin un Amigo DIDI, el a bisa cu e campaña cu a cuminsa ayera ta ilustra algo cu algun personanan ya sa caba “pero ainda falta pa nos sigui traha”.

Croes a señala cu nan ta ripara cu hopi hende ta conoce kico Amigo DIDI ta encera pero nan no ta haci uso di dje, ta p’esey cu nan a dicidi di sigui traha riba dje pa conscientisa y pa por tin un Aruba mas sigur.

Croes cu ta e mama di un mucha muhe cu algun añanan pasa a fayece pa via di un chauffeur cu tabata bao influencia di alcohol a expresa pa diferente medionan di comunicacion cu esaki ta algo hopi personal, pero cu “di algo hopi malo nos por a saca algo hopi bunita”, el a finalisa.