Durante un conferencia di prensa ayera mainta Fundacion Anti Droga Aruba (FADA) a lansa nan jingle oficial como parti di nan proyecto di prevencion di salud mental y adiccion pa 2022.
Director di FADA, Sr. Juendel Sprok, a elabora mas ariba e meta di e proyecto aki. Minister di Asuntonan Social y Husticia, Sr. Rocco Tjon tambe a hiba palabra y a anuncia plannan pa otro proyecto nobo di FADA enfoca tambe den e area di prevencion di salud mental y adiccion.
Sr. Sprok a splica cu despues cu nan a firma e “samenwerkingsovereenkomst” cu e partnernan cu ta traha den e area di adiccion y salud mental, nan lo traha mas cu otro, mas hunto, mas di cerca pa asina logra brinda un miho servicio na e comunidad di Aruba. Esey ta e meta principal di FADA, el a indica, unda cu e parti preventivo cu FADA ta enfoca riba dje ta bay haya mas atencion, ta bay haya otro dinamica y aworaki nan lo enfoca ariba salud mental tambe, apart di prevencion di adiccion, cu ta un problema cu sobretodo den e pandemia a escala. “Aworaki e parti preventivo lo hunga un rol hopi importante hunto cu nos partnernan den e parti curativo”, el a bisa.
Sprok a señala cu na momento cu nan firma aña pasa e samenwerkingsprotocol nan a haya un mandato mas cla caminda FADA lo ta entidad cu lo tuma e parti preventivo di salud mental y adiccion over. Pa cu esaki el a splica cu nan a haci diferente trainingnan pa nan personal, nan a bin cu diferente foyeto nobo den e parti di salud mental unda cu nan lo enfoca ariba e muchanan na scol pa asina nan por ta liber pa papia, pa nan por expresa y pa nan por sa tambe unda nan por bay ora nan tin problema. “Tambe pa cualkier hende cu yega cerca nos cu tin pregunta nos por scucha nos ta duna informacion y si tin mester nos ta pas’e pa nos coleganan cu ta haci e parti curativo”, el a agrega.
Minister Tjon na prome luga a felicita FADA cu e proyecto aki. El a enfatisa cu e importancia di a logra firma aña pasa e samenwerkingsprotocol tabata pa asina na un banda por delinea e procesonan pa brinda un miho servicio na e clientenan. Y di otro banda el a remarca cu e protocol aki nan por haci mucho mas cu menos recurso. “E meta semper ta pa baha e presion cu tin riba e specialistische zorg, e derde lijn y mi ta kere cu un proyecto asina caminda bo ta bay percura pa informacion yega cerca esunnan cu tin mester di esaki ya caba bo ta bay haci e servicio y e cuido mas accesibel”, el a indica.
El a subraya cu ta locual FADA mes ta haci pa e proyecto aki ta hopi importante. El a splica cu apart di bin cu e idea pa e proyecto, FADA a percura tambe pa un encuesta bao di diferente scolnan na Aruba pa asina nan por haya sa di e hobennan mes kico nan sa caba di e materia di salud mental, kico nan no sa di e materia y principalmente kico e hobennan mes ta wak como e necesidad. E hobennan mes a indica den e encuesta den a parti di salud mental cu nan ta hopi interesa pa haya mas informacion di e materia aki.
Minister a recorda tambe cu durante un reunion cu Minister President y Parlamento Hubenil nan tambe a trece e punto aki pa dilanti, unda cu nan tambe ta wak e necesidad pa no solamente haya informacion riba e tema aki, pero cu nan por haya e hermentnan necesario tambe pa siña con pa enfrenta cu e situacionnan cu por presenta pa nan propio salud mental.
“Mi ta hopi contento y hopi satisfecho cu e proyecto aki. Di parti di Ministerio sigur nos lo sostene esaki tambe”, el a agrega.
Durante e conferencia di prensa Minister Tjon a anuncia otro proyecto di FADA cu lo ta enfoca tambe ariba prevencion. El a splica cu den e mesun encuesta realisa a studia kico ta e miho forma cu e informacion aki por yega cerca e hobennan. Cu e proyecto nobo aki FADA a propone pa drenta den e barionan di Aruba y yega mas di cerca di e scolnan a traves di un bus preventivo cu lo wordo ekipa cu tur e materialnan necesario pa brinda e informacion importante aki.
Minister a menciona cu siman pasa caba dialogo a cuminda cu FADA pa asina cristalisa e proyecto di bus preventivo y el a remarca cu pa loke ta e parti presupuestario e no ta wak niun reto cu no lo por wordo surpasa.
“Kiermen di e banda aki mi ta sigur cu si e cooperacion sigui manera cu e ta e proyecta esaki lo por bira realidad e aña aki mes tambe y di e forma ey percura pa tur e informacion aki yega cerca mas hoben. Di parti di Gabinete Wever-Croes II nos ta comprometi pa brinda alivio na loke ta e tema di salud mental. E ta un reto cu cada mes nos ta keda analisa. No solamente a corto plazo pero pa bin cu solucionnan a largo plazo tambe”, el a agrega,
Rubiella Toppenberg, trahado preventivo di FADA, a splica cu e idea tras di e video y e jingle nobo aki ta pa yega na e hobennan principalmente cu nan mensahe. “E meta semper tras di FADA ta prevencion. Nos a usa diferente palabranan di nos proyectonan cu nos tin caba y nos tin palabranan cu ta kom voor hopi den e veld, manera peer pressure, algo cu nos hobennan ta enfrenta tur dia y ta algo cu sigur ta trece un problema cu salud mental hopi grandi entre nos hobennan y nos ta topa esaki den e veld asina hopi cu nos a dicidi cu e ta tambe algo hopi importante pa tin den nos jingle pa asina e hobennan sa cu si bo tin informacion valioso y corecto bo por enfrenta diferente retonan cu bida ta trece cune”, el indica.
Toppenberg a enfatisa cu no por sconde cu salud mental ta un problema cu ta asota nos isla enormemente. Manera el a indica nan ta topa cu e problema ey tur dia y como trahado preventivo el a ripara cu despues di e pandemia el a bira algo cu mester papia di dje mas frecuentemente.
“Mi ta spera cu e lansamento aki yuda pa nos papia mas tocante e temanan aki. No laga nos sconde pa miedo of pa berguensa. Sa cu tin personanan, tin fundacionnan y aworaki nos tin un Gabinete cu ta sostene esaki totalmente. Laga nos ban haci uso di e oportunidad aki pa kere firmemente den prevencion y si abo ta sufri di cualkier problema cu bo salud mental of ta sinti un desbalansa no duda pa busca informacion pa asina bo por yega na e ayudo profesional”, el a señala.
