Cu e fin di conscientisa comunidad mirando cu aña escolar nobo a cuminsa, ayera Fundacion Anti Droga Aruba (FADA) a realisa un conferencia di prensa tocante adiccion na droga y videogames.

Rulienne Arends, trahado preventivo di FADA, a splica cu na a cuminsa prepara nan mes den temporada di vakantie pa nan por ta cla cu nan charlanan y tayernan na scolnan ora aña escolar ta inicia.

E charla y tayernan ta forma parti di e programa cu nan ta ofrece na mucha y hobennan, di cual Arends a enfatisa cu nan a actualisa diferente topico y tin otronan nobo cu a bin acerca a base di peticion cu nan a haya for di docentenan of mayornan mes.

Nan tin programa di adiccion pa muchanan for di 4 aña di scolnan primario, te cu esnan di mas grandi unda nan ta ofrece diferente charla di adiccion for di varios aña pasa. Tambe nan tin otro programanan como ‘B – Smart’ y ‘Paga Tino’ cu segun Arends ta programanan ta wordo pidi bao e muchanan di vijfde y zesde klas. Tambe nan a prepara diferente tema importante pa docentenan riba e parti di adiccion.

Mirando cu na januari FADA a cuminsa un reto nobo, cu ta e parti di salud mental, nan tin un programa dedica na esey tambe unda cu cada klas ta haya algo diferente compara cu otro mucha di klasnan mas avansa, y tambe ta dirigi na docentenan.

For di otro siman, manera Arends a sigura, tur scol ta bay haya e schema di salud mental y adiccion unda cu tin scol cu ya tin esaki caba.

Di su parti, Miosotis Tromp, trahado social di FADA a trece dilanti e programa ‘Moti-4’ cu a keda conoci na aña 2020, cual ta un programa di motivacion cu nan ta ofrece na hobennan entre 14 cu 24 aña cu ta experimentando cu substancianan legal como humamento y alcohol y esunnan ilegal cu ta marihuana, cocaina of ecstasy, entre otro.

A base di esaki, nan a cuminsa mira den añanan escolar anterior e necesidad pa tambe ofrece e motivacion pa muchanan cu ya caba ta den mundo di videogames y cu ta dedica hopi tempo na esaki.

Di e programa di Moti-4, Tromp a informa cu esaki ta consisti di cuater seccion cu ta wordo duna door di un trahado social na studiantenan cu diferente herment pa yuda nan reconoce kico ta e efectonan cu e substancianan ilegal y legal por tin riba nan y tambe e efecto di videgames.

Un di e efectonan cu adiccion na videogames ta causa pa muchanan ta cu scol ta perde importancia pa nan, tambe e parti social ta perde importancia, nan ta enfoca mas riba e wega y esey ta un problema. Unabes cu un mayor ta bisa nan yiu por ehempel pa bay come, su reaccion ta grita e mayornan. Tambe tin casonan cu muchanan no ta sali for di camber pa motibo cu nan tin mas interes pa e wega.

Mester tin un control, pa motibo cu esey por keda escala te bira un problema grandi. E problema tambe ta cu tin biaha mayornan ta reconoce cu tin algo no ta canando bon, pero tambe ta existi algun mayor cu no ta ripara nada te ora cu nan ta wak cu e situacion a sali for di man.

Algun mucha ta bira adicto pa videogames pa motibo cu nan ta sufri di termento (bullying) y esey tambe ta kita interes di bay scol. Nan ta prefera di keda na cas y hunga cu nan amigonan online, pero nan no sa e peligernan, cu nan por bira victima di un hacker of pedofiel pa motibo cu hopi adultonan tambe ta hunga.

Videogames como tal ariba nan mes no ta malo, pero e mester ta controla, unda cu e parti importante ta educacion. Mayornan tambe por haya terapia pa cu esaki, pa motibo cu nan tambe mester forma parti di e proceso. Por ta cu nan ta reconoce cu e problema ta existi, pero tambe nan por tin necesidad di ayudo psicologicamente.

Den e programa Moti-4 e hermentnan ta enfoca riba e substancianan legal y ilegal, ademas di e comportamento di e muchanan mirando con ta reacciona riba dje. “E programa aki por wordo ofreci na tur mucha na Aruba unda cu por wordo pidi tanto pa mayor como docente na scol, cu ta mira esaki, of di e mesun hoben cu por ta e ta sinti cu e mester un tiki guia”, Tromp a expresa.

Nan a mira cu hopi hoben caba a pasa den e trayectorio aki, pero Tromp a enfatisa cu cada situacion di un hoben ta diferente. Si nan ta ripara cu el a yega na un punto di adiccion, nan como fundacion tambe tin e posibilidad di dirigi e hoben na Consultorio pa Asuntonan di Adiccion (CAA).

“Ta hopi importante pa menciona cu e programa aki ta trece hopi cambio, pero nos meta pa cu esaki ta pa hobennan mes yega na e punto di realisa cu nan mes kier yega na stop di uso di substancianan ilegal of legal, pero tambe pa loke ta e video weganan y asina minimalisa e uso extenso di dje”, el a bisa.

E ta considera importante pa hobennan por uni na e programa aki cu a haya un bon acogida e temporada pasa, manera el a expresa, ya cu FADA ta esun cu kier trece cambio y conscientisacion di crea muchanan fuerte y resistente na situacionnan cu ta sucede rond di nan.