Rulienne Arends trahado preventivo di Fundacion Anti Droga Aruba a informa cu e aña aki e campana di conscientisacion cu ta documentario basa riba bida real ta cumpliendo cinco aña.

E meta su tras ta pa otro hendenan por conta nan historia pa yuda mas hende cu por ta pasando den un mal momento sea cu adiccion of cu salud mental den e caso aki.

Arends a informa cu e aña aki nan tin tres persona cu tabata dispuesto pa conta nan historia, nan realidad y kico nan a pasa aden of ainda nan ta pasando aden. Den historianan, nan ta enfoca riba adiccion y kico ta e factornan cu ta causa esaki cu ta persona aki usa substancia pa e por deal cu loke tabata pasando cune, ademas tin un otro persona cu ta bay conta su parti di loke ta trata salud mental, con tur esaki a bin dilanti y kico ta e factornan di riesgo, e di tres persona ta bay conta kico a pasa cune algun aña pasa ora e tabata na caminda pa trabou y con un persona bao influencia di alcohol a accidente den dje frontal y e persona aki ta bay conta con te dia di awe ainda e ta pasando den duro door di e accident ey.

Jeimy Bareño, Patrick Vries y Antonio Quant hunto cu su casa, e aña aki tabata di acuerdo pa conta nan historia pa por yuda comunidad, “nos tin di bisa cu ta historianan hopi impactante, cada un cu un mensahe hopi fuerte na final y nos ta encurasha tur hende pa tin sintonia pa loke ta trata e produccion aki unda awe nos ta sacando e prome trailer y e documentarionan ta bay sali un bes pa siman,” Arends a bisa.

E fechanan di publicacion di e documentarionan ta bay ta 26 di september, 03 di october y 10 di october pa 9or di anochi riba diferente plataforma como television na canal Telearuba y otro medionan di comunicacion online, ademas di FADA su Facebook page.

Arends a trece dilanti cu den cinco aña aki, durante of despues cu e documentarionan ta sali nan ta haya hopi yamada of hopi mensahe di personanan pa nan mes of nan famia di kico nan tin cu haci, unda nan tin cu bay pa yudansa unda nan tabatin casonan di personanan den comunidad cu kier keda anonimo y nan kier yuda un otro persona pa rehabilita, nan tambe tabatin casonan di personanan cu a logra bay afo door di yudansa.

“Nos ta wak e parti positivo unda cu personanan ta willing pa yuda y nos tin bisa cu nos tin personanan cu ora nan ta wak e documentario, nan ta tuma contacto pasobra nan ta desea di forma parti di un siguiente temporada pa por conta nan historia tambe.” El a bisa.

Den e caso aki FADA ta desea pa yega na diferente edad, aunke e orario di e documentario ta un tiki laat pa muchanan por wak esey, pero den pasado manera Arends a sigura, hopi scol ta tuma contacto cu nan pa pidi e videonan pa nan pasa nan na scol, den klas hunto cu e muchanan “esey ta loke nos ta stimula tambe, nos tin mayornan cu ta sinta hunto cu nan yiu y nan ta wak e episodionan aki y nos tin di bisa cu nan ta episodio cu ta pa tur edad y como mayor, e ora bo ta sinta, papia, combersa cu bo yiu, splica nan kico e personanan ta pasando aden y si nan echt por compronde esaki,” Arends a bisa.

Pa loke ta trata e grupo di mas grandi cu ta entre 30 pa 40 aña, Arends a comenta cu nan tambe ta yega na e grupo aki no solamente door di e documentario pero door di otro campaña y charlanan tambe, ademas el a sigura cu ora nan ta na scolnan, vooral scolnan secundario, hopi hoben sa tocante e documentarionan. “Por ta nan no ta wak tur e episodionan pero si nan ta conoci cu e programa aki.”

Pa hopi biaha e historianan cu ta ser conta, hopi hende ta pasa den situacionnan similar, ta importante pa scucha di un otro kico el a haci pa recupera of kico ta e pasonan cu el e tuma pa yega unda cu e ta aworaki, tin di nan cu no a logra recupera completamente, algun ainda tin cosnan mas chikito cu nan ta bezig ainda den recuperacion pero e no ta kita cu nan a yega un caminda hopi leu di na unda nan tabata prome y esey tambe nan bay trece dilanti den e documentario.

Despues cu e fundacion a involucra cu e topico di salud mental, tambe esey ta bin dilanti, unda cu den un documentario di un temporada anterior tabatin e historia di depresion y ansiedad. Nan a haya reaccion riba esey, caminda hende a sigura cu nan a haya forsa pa papia over di e topico pa via cu nan tabata sinti miedo. “Hopi biaha miedo y berguensa ta pone cu un persona ta prefera di wanta loke e ta sinti en bes di busca un ayudo, y cu esaki nan ta sinti un empuhe pa nan. Esey ta e meta su tras, pa esnan cu ta sinti un desbalansa cu nan salud mental of ta struggle cu un of mas adiccion, e idea ta pa haya un push pa wak kico ta importante pa busca ayudo trempan y na tempo”, el a comenta.