Fundacion Anti Droga Aruba (FADA) a anuncia “Siman di Bisti na Locura” caminda pa 12 aña esaki ta e campaña mas grandi y mas gusta pa loke ta e siman di cinta cora segun Rulienne Arends trahado preventivo a informa ayera den un conferencia di prensa.
Hunto cu e campaña aki nan ta para keto na uso y abuso di loke ta droga unda pa 12 aña FADA tin e campaña aki unda cu no solamente a nan como fundacion ta forma parti sino hopi hende mas ta participa, como por ehemplo, muchanan mas chikito y babynan tambe. “Pero e grupo cu nos ta enfoca mas riba dje ta keda nos muchanan di scol,” el a bisa.
Aña pasa nan tabatin un averahe di mas o menos casi 2.000 potret cu nan a ricibi mediante nan Facebook page of comparti priva unda hopi scol y companianan a participa.
Nan ta haci campaña Red Ribbon Week cu originalmente ta di Merca, crea pa National Family Partnership, anteriormente National Federation of Parents for Drug Free Youth, el cual a ser estableci como un organisacion di base, sin fin di lucro na 1980 door di un grupo di mayornan preocupa y determina cu tabata convenci cu nan mester cuminsa hunga un rol di liderazgo den prevencion di droga.
FADA ta haci uso di e campaña aki unda e lema ganador di 2024 ta “Life is a movie, film drug free” y pa e siman di locura cu lo cuminsa for di 28 di october te cu 1 di november e participantenan lo haci algo diferente manera bisti un paña cora, bisti di colornan neon, bisti mea di emocion, dress up na actor, actriz, artista of caricatura faborito y decora un bril di manera creativo.
E siman aki di bisti na locura segun Arends, FADA ta enfoca masha hopi mes riba creatividad “e no ta un campaña cu nos tin cu bay saca plata di un caminda, no. Ban ta creativo,” el a sigura.
Pa participa, esnan interesa por bishita e website www.fada.aw y click riba e poster di Bisti na Locura pa por yena e formulario y upload e potretnan. Nan tambe lo duna premio na esnan cu lo ta mas creativo e aña aki.
Ademas, Arends a informa cu nan lo post un video informativo riba nan rednan social pa mustra den ki forma por ta mas creativo.
Aña pasa, nan a cuminsa duna na tur scol basico un Red Ribbon Week Box unda tin diferente material pa docentenan por splica e muchanan dicon FADA ta haci e siman di Bisti na Locura, ademas di un video informativo dirigi tambe pa e muchanan.
Nan como FADA cu ta bishita adictonan ambulante pa nan documentarionan basa riba bida real, ta mira cu di berdad tin hopi mucha hoben cu ta circula riba caya y esey ta un preocupacion grandi pa nan, “nos ta den contacto cu otro organisacionnan pa wak den ki forma FADA lo por yuda si nos ta mira un hoben riba caya ya cu nos ta traha den e parti preventivo, pero e ta un enfoke sigur riba e hobennan di 13 aña bay ariba cual ta e grupo mas dificil,” el a sigura.
