Dialuna atardi Minister di Husticia y Asuntonan Social, Sr. Rocco Tjon a reuni cu director y trahadonan di Fundacion Anti Droga Aruba (FADA). Den un entrevista pa Bon Dia Aruba Srta. Rulienne Arends di FADA a elabora ariba con e reunion a bay y kico tabata algun punto di hopi importancia cu FADA a presenta na minister.

E mision di FADA ta pa crea un comunidad saludabel den e prevencion di uso y abuso di diferente substancia legal of ilegal, promove e bienestar di salud mental, apoya y educa comunidad pa preveni e uso di droga.

Srta. Arends a indica cu e reunion cu Tjon a bay hopi bon, unda cu FADA a haya e oportunidad pa splica minister kico ta e trabaonan cu nan ta bezig cune actualmente, kico ta e proyectonan cu FADA ta finalisando pa asina prome cu aña caba lansa e proyectonan ey, y nan a haya e oportunidad tambe pa papia di proyectonan cu FADA kier cuminsa y e importancia di cada un di e proyectonan ey.

“E tabata un reunion hopi fructifero. Nos a haya e momento cu nos por a duna full e splicacion di cada proyecto nobo cu nos ta wak ta importante. Nos tin di bisa cu e tabata hopi abierto pa scucha tur esaki y na mesun momento e tabatin e oportunidad di haci preguntanan ariba cualkier duda cu nos por a contesta esakinan”, Arends a bisa.

El a splica tambe cu Tjon a wak e importancia tambe, scuchando di e trahadonan preventivo, di kico ta loke cu FADA ta topa cunele ora cu nan ta cerca e muchanan, ora cu nan ta duna nan charla, e informacion, kico ta e situacionnan cu nan ta topa cune na e momento eynan. Y di mesun manera el a indica cu di parti di FADA nan a splik’e tambe kico eigenlijk nan ta encontra cune ariba caya mes cu nan por drecha y mehora pa asina toch por brinda e ayudo na comunidad di un manera optimal.

El a enfatisa cu pa FADA e parti mas importante ta e rol di cada persona pa loke ta trata e desaroyo y e guia di e muchanan, e importancia pa nan ricibi no solamente informacion y consecuencia di cada substancia legal of ilegal, pero tambe e parti di toolsnan cu FADA, entre otro, ta ofrece nan.

Otro punto cu Srta. Arends a indica ta importante, y cu papia hopi ariba dje durante e reunion, ta e parti di ayudo unda cu hopi biaha comunidad ta pone hopi enfasis cu nan no ta sinti cu tin suficiente yudansa. “Eynan tambe nos por a papia cune amplio di e parti aki y kico nos di FADA ta sinti cu falta y cu mester mehoracion pa asina e ayudo por ta mas optimal”, el a bisa. “Esey ta algo cu nos a pone mas enfasis ariba dje mirando cu e ta un peticion den comunidad”.

Aunke FADA ta enfoca ariba e area di prevencion, ayudo curativo pa comunidad ta algo cu nan ta topa cune diariamente ora cu personanan ta yama pa ayudo. P’esey, segun Arends ta indica, aunke cu nan ta riba e area di prevencion nan ta encontra cu situacionnan cu toch mester ayudo curativo y nan a tuma e oportunidad pa splica Minister Tjon kico nan ta pensa di nan banda lo por mehora e parti curativo tambe.

Pa locual ta trata futuro proyectonan Srta. Arends no a por a divulga hopi informacion, pero si a indica cu den e parti di adiccion FADA tin hopi proyecto- y programanan nobo cu nan kier cuminsa. El a bisa tambe cu den luna di november FADA ta bay lansa un programa pa loke ta trata salud mental. “Sin duna mucho informacion, mi por bisa si cu nos a haya e oportunidad pa splica minister e parti nobo cu FADA ta bay enfoca ariba dje y e luna aki, si tur cos ta bon nos ta bay lans’e”.

“Esey ta un di e proyectonan cu ainda pa e aña aki nos ta bay saca pa nos comunidad pa wak kico extra FADA tin di ofrece y nos tin algun otro cu ta den planning cu nos no por divulga pasobra eseynan ta proyectonan hopi grandi cu pa otro aña nos ta spera cu nos por realisa y nos a haya e oportunidad di elabora ariba esey tambe cu minister”, el a agrega.

Recientemente Aruba a firma un acuerdo di cooperacion cu Corsou, Sint Marten y Bonerio pa mehora cuido di salud mental y adiccion. Arends a splica cu e director di FADA ta forma parti di e cooperacion aki tambe. El a indica cu FADA ta sumamente contento cu gobierno ta wak e importancia pa locual ta trata salud mental hunto cu adiccion y nan ta ricibi y comparti informacion tambe ora cu ta necesario. “E acuerdo ey ta uno cu sigur lo beneficia no solamente nos comunidad pero tur e fundacion- y instancianan cu ta traha ariba ambos tereno”, el a expresa.

El a conta tambe cu Minister Tjon tabata hopi contento di scucha tur e trabaonan cu FADA ta haci y di mesun manera el a bisa cu Minister Tjon a expresa su interes pa yuda unda cu e por y unda cu tin mester.

“E ta kere hopi den loke ta e parti di prevencion, pasobra manera nos mes ta bisa prevencion ta eigenlijk e yabi, si e parti di prevencion ta fuerte e parti curativo no lo tin asina hopi trabao. Nos ta hopi contento cu nos por a ricibi bishita di dje y nos sa tambe cu no lo ta e ultimo. El a bisa tambe cu e proyecto nobo cu nos ta bay lansa e kier t’ey presente dus esey caba ta indica e interes cu e tin den loke ta FADA y e parti di prevencion”, el a agrega.