Temporada di carnaval ta un temporada di hopi actividad, hopi celebracion y esaki ta trece cune consumo di alcohol. Fundacion Anti Droga Aruba (FADA) ta bay ta activo den Carnaval 69 cu nan campaña Amigo DIDI pa conscientisa comunidad completo ariba e uso di alcohol.
Den un conferencia di prensa pa medionan local, Miosotis Tromp, trahado social di FADA, a indica cu carnaval ta un temporada durante cual nan ta hopi activo mirando cu e dianan mas druk ta yegando cerca.
El a splica cu nan a cuminsa cu diferente plan y nan lo ta bishitando diferente luga cu nan bannernan pa informa y conscientisa pueblo completo ariba e importancia di e campaña amigo DIDI.
Tromp a remarca cu aunke amigo DIDI ta wordo mira mas como un campaña pa adulto so, den e ultimo simannan di januari nan ta hopi druk bezig bayendo na diferente scol, dunando diferente charla, specialmente pa loke ta alcohol, mirando cu cada dia e ta birando un tiki mas popular den hobennan y tambe den muchanan cu ta bay parada cu ta experiencia esaki.
“Hopi biaha nos ta bay parada, lubida cu e muchanan porta no ta custuma di mira hende bebe alcohol of ta experiencia hende burachi diariamente. E ta hopi importante pa splica nan cu na parada e cosnan ey ta pasa y den caso cu esey pasa mester pone atencion pa ta OK y e mucha ta para band’i mami pa tur cos ta sigur,” el a subraya.
El a enfatisa cu pa nan ta hopi importante pa purba conscientisa mayornan cu e yiunan ta sigui e ehempel cu nan wak y e mayornan mester ta e ehempel cu ta duna e muchanan e espacio pa compronde cu alcohol no ta algo cu ta importante den nan bida.
“Di nos banda nos ta bezig ta conscientisa e muchanan tambe pa corda nan mayornan cu si nan ta bebe no stuur y si mester stuur pa tin un amigo DIDI. Ta importante pa remarca cu amigo DIDI ta e persona cu stuur y no esun cu ta compaña na banda,” Tromp a subraya.
FADA Aruba lo ta presente den tur e paradanan grandi cu nan bannernan pa keda recorda comunidad kico ta meta tras di e campaña. “Alcohol ta algo cu no mester ta parti di carnaval y si bo ta haci’e parti di bo experiencia pa please haci’e modera,” el a finalisa.
