Manera ta conoci Fundacion Anti Droga Aruba (FADA), hunto cu Fundacion Zinnia, ta colabora ariba e campaña Amigo Didi. Un campaña cu tin como meta conscientisa e pueblo di Aruba ariba e consecuencianan cu por tin ora cu un persona consumi alcohol y stuur auto.
Ayera FADA a lansa e video di conscientisacion pa luna di december pa e campaña Amigo Didi den cual por mira kico por pasa ora cu un persona cu consumi alcohol subi tras di stuur di un auto.
Amigo DIDI ta un campaña nacional cu tin como meta conscientisa comunidad completo ariba e peliger- y consecuencianan di stuur auto bal influencia di alcohol of otro substancianan. E campaña aki a inicia oficialmente na 2016 y ta un iniciativa di FADA y Fundacion Zinnia, den colaboracion cu Cuerpo Policial di Aruba.
FADA su obhetivo a traves di e campaña Amigo DIDI ta pa informa y educa personanan ariba kico un Amigo DIDI ta. Amigo DIDI ta e persona cu na un fiesta of celebracion ta e persona designa cu no ta bebe alcohol pa asina por hiba e personanan cu si a bebe alcohol pa nan cas sano y salvo. Alcohol tin influencia den e comportacion di un persona den diferente manera y pa e motibo ey e Amigo DIDI no ta bebe alcohol.
Esaki ta di shete aña cu FADA ta activo cu e campaña di Amigo DIDI y durante henter aña nan ta traha pa conscientisa pueblo. Ayera Amigo DIDI a lansa nan video nobo pa temporada di fiesta di fin di aña pa asina un biaha mas recorda comunidad ariba e consecuencianan grave cu por tin na momento cu un persona no haci uso di un Amigo DIDI y dicidi di stuur bou di influencia di alcohol.
