Aruba mester enfoca riba creacion di experiencianan transformatorio pa sigura futuro den hospitalidad. Esey tabata e mensahe cu Robin DiPietro, profesor honorario a presenta den fin di siman, na ocasion di e celebracion di 20 aniversario di Facultad di Hospitalidad y Estudio den Maneho den Turismo, FHTMS di Universidad di Aruba.

Dirigentenan di Universidad di Aruba, di e facultad hunto cu asina yama ‘capitannan di industria’ a bin hunto na e ballroom nobo, na St. Regis Resort pa un conferencia cu tabatin como titulo “Bridging Current and Future Leaders” (Conecta Lidernan Actual cu Esnan di Futuro) pa conmemora e evento special. Manera ta conoci, Universidad di Aruba a dicidi hopi trempan cu kier amplia su academia cu turismo, y a logra esaki danki na entre otro un donacion di 20 miyon florin di Marriott Corporation cu a logra pone e fundeshi pa un di e facultadnan mas importante pa Aruba.

Dr. DiPietro a sigui bisa den su presentacion cu ta importante pa tuma di pasado, pero mas importante ta pa move den crea experiencia cu ta hiba e cultura di Aruba Dushi Tera y corda cu e ‘One Happy Island cu por brinda un experiencia unico. “ Locual ta importante pa FHTMS awor ta cu studiantenan mester haya un enseñansa pa por traha cu hende cu ta multigeneracional, multicultural y tambe cu coleganan/empleadonan cu ta refleha e sociedad aki, “pa asina nan por nabega e mundo nobo di hospitalidad,” segun DiPietro.

Docente di FHTMS, Thais Nierop tambe tin un historia largo cu e facultad. Ya pa 19 aña, Nierop no solamente ta duna les, pero ta percura pa studiantenan haya nan experiencia internacional pa asina expande nan conocemento. Nierop tambe a hiba palabra, y a ilustra e storia di FHTMS segun un cuento cu e mes a skirbi. Den e cuento, e docente ta describi e isla chikito ‘Ruba,’ rondona pa sernan cu ta biba den lama. E hendenan di ‘Ruba’ tabata esnan mas cariñoso, cu e sonrisanan mas genuino cu tin. “Nan tabata hende cu tabata canta y baila mientras cu ta pisca y semper tabata yuda e naufragionan sin puntra algo bek. E cuento a papia di animalnan cu ta representa esnan cu a descubri e encanto di e isla y e hospitalidad di su hendenan. Y con e ‘oro’ a cuminsa drenta e isla danki na bishitantenan. Di un isla contento, el a bira un isla hopi druk, cu yen di palapa, boto y hasta zonido di drone enbez di canto di parha. E hendenan, un tempo liber cu nan hari a cuminsa pone un balor na nan sonrisa. E resultado ta cu ya ningun tabata canta y baila ora tabata traha, pasobra mester a pura pa hiba producto pa e hotelnan. Te dia cu lama a benta un spiel riba tera, y un hoben yama Maria, no a mira su mes, pero ‘Ruba’ con e tabata antes, contento. Maria a hiba e spiel pa su hendenan mira, pero hopi a bira cara. Finalmente e lider di ‘Ruba’ Buchi a mira den e spiel y a tira su corona di oro den lama. Hendenan a reuni bou di e mata bieu di canto y nan tabata keto na comienso. Maria a bisa: “Nos ta bendiendo pida di nos mes,” den un suspiro. “Nos a yama bon bini na mundo, pero a lubida di bisa bon bini na nos mes.” Y poco poco mas di e habitantenan a admiti cu por comparti e isla magico sin mester regala esaki. Kizas cu menos bishitante, nan por a brinda mas di nan mes, sin mester a pone un prijs. “Crece, pero nunca lubida bo raiz,” tabata e mensahe di Nierop, unda reflexion propio ta esencial pa Aruba no perde su mes den demasiado turismo.

 

Dr. Ryan Peterson, e prome decano di FHTMS tabata tambe e orado principal durante e conferencia. Durante su presentacion cu ya ta unico den estilo, dr. Peterson, kende actualmente ta gerente di Division Economico y Stabilidad Financiero na Banco Central di Aruba, a toca e tema di ‘Game of Tourism,’ e wega di turismo. Su enfoke tabata riba e pasado, presente y futuro di HTMS (hospitalidad, Turismo, Estudio den Maneho) cu mas bien ta mas enfoca riba maneho cu e hospitalidad y turismo mes.

Den e formato di quiz, Peterson a trata di pusha esnan presente di participa activamente, y mas importante, pensa criticamente riba e tema presenta. Pasobra pa por hiba turismo di Aruba na e siguiente nivel, e facultad tambe mester ta ekipa pa produci e siguiente lidernan cu tin e habilidadnan pa pensamento critico y con ta traha pa futuro. Pa por percura cu studiantenan di FHTMS ta encurasha pa desaroya e habilidadnan aki, tanto e facultad mes, pero tambe esnan den e industria mester adopta esakinan, segun dr. Peterson.

El a comparti como tal locual e ta considera e sabiduria di e turtuga, cu ta pa cada uno, esta studiante, staff y esnan den turismo en general, haya nan fluho, consistente y trankilo. “Cada uno mester sa di madura cu elegancia, sin perde curiosidad, sinti bo mes comfortable cu ken bo ta, y biaha bo mes, leu y gosa di e paisahenan. Pero tambe, e ta importante pa tuma tempo liber y gosa di lama y manera un turtuga, lanta cabes y hala rosea.”

E ex decano na final a haci e pregunta cu cada persona den e industria mester contesta pa su mes, esta cu banda di e habilidad di por pensa critico, cua ta e otro competencia y habilidad elemental ta considera importante pa desaroyo personal di liderazgo, y con FHTMS por percura cu ta fomenta esakinan mas ainda. “Si cada un por haci un cambio na un aspecto di Universidad di Aruba of kizas hasta na e industria si tabata tur e poder y recurso pa haci tal, sabiendo cu exito ta garantisa, cua ta esaki y pakico? Y cua ta boso mensahe crucial na studiantenan, facultad y industria.”

Den otro palabra, e 20 aniversario di FHTMS por tabata un celebracion di logro, pero mas bien e enfasis tabata pa cada persona envolvi cu e instituto y sigur industria di turismo di Aruba, pensa criticamente riba cua ta e rekisitonan y habilidadnan pa otro 20 aña di exito. No solamente di e facultad sino tambe di e industria turistico di Aruba.