Durante anochi informativo organisa pa Universidad di Aruba e diferente facultadnan a tene presentacionnan pa esnan cu interes pa cuminsa un estudio na nivel academico na Aruba mes. Den edicion di awe, nos lo elabora riba e presentacion duna pa Facultad di Ley. Durante e anochi 3 persona a hiba palabra dilanti: Viola van Bogeart, decaan di e facultad, Ryçond Santos do Nascimento, un di e profesornan di e facultad y Jurney Tromp, kende ta den su ultimo aña pa caba su Bachelor na e facultad.
Segun sra. van Bogeart, un rason cu hopi studiantenan ta scoge pa cuminsa nan estudio di ley na Aruba ta pasobra mas o menos 3 aña pasa e organisacion cu ta acredita institutonan na Hulanda y Belgica, NVAO, a duna un conseho positivo pa loke ta trata e calidad di enseñansa ofreci na Facultad di Ley di Universidad di Aruba. Esaki kiermen cu e organisacion ta reconoce cu e nivel di enseñansa na e facultad no tin menos balor cu na un facultad di ley Hulandes.
Structura di e estudio
Sra. van Bogeart a duna un splicacion di con e estudio na nivel di bachelor ta hinca den otro. Pa e prome aña, studiantenan ta haya conocemento general di ley y e materia basico cu un hurista tin mester di dje pa por ta exitoso. “Con bo ta lesa un texto huridico, con bo ta interpreta leynan, con bo ta anda cu decretonan y con pa compronde e conversacion cu ta tuma luga den corte. Tur esaki bo lo siña den e prome aña”.
Durante e prome aña e studiante lo ser conoci cu materia di privaatrecht, staatsrecht, bestuursrecht y strafrecht. Pero tambe lo bay den detaye riba e filosofia di ley y derecho. “Ora nos trata e materia di filosofia di ley y derecho nos ta purba cuestiona dicon leynan ta e manera cu nan ta y tambe si nos lo por haci esaki di otro manera”.
“Un parti importante di un estudio teoretico ta envolvi con nos lo por influencia e materia, den e caso aki ley. Leynan nunca ta stop di cambia. Derechonan di ayera no ta e derechonan di awe, y derechonan di awe no ta e derechonan di mañan”.
Den e di dos aña e studiante lo bay mas den detaye riba e materia cu a wordo trata durante e prome aña, enfocando riba staatsrecht y bestuursrecht Arubano, derecho internacional y strafprocesrecht. Tambe lo compara ley y derecho Arubano cu ley y derecho Hulandes pa asina haya mas conocemento con e dos tipo di derechonan aki tin similaridad y alabes ta diferencia di otro.
E studiante ta haya un guia intensivo durante e prome aña pa asina ‘mustra nan e caminda cu tin di cana’, pero den e di dos aña y tambe e di dos aña e universidad ta spera di e studiante pa bira mas independiente y busca su mesun caminda. “Pero nos ta percura pa duna bo e hermentnan necesario pa por independisa bo mes den bo interesnan huridico”.
Esaki tambe ta wordo refleha den e di 3 aña, cual ta trata materianan mas amplio manera derecho Europeo, goederenrecht y derechonan civil den e prome semester. Un aspecto cu sra. van Bogeart ta subraya cu no solamente lo studiantenan siña intepreta texto huridico y ley, si no tambe con pa skirbi texto huridico y con pa presenta esaki.
Programa pa studia den exterior
Durante segundo semester di e di 3 aña, studiantenan por scoge pa tuma parti di e studentenrechtbank, cual ta un manera pa studiantenan experiencia con lo ta pa ta un abogado, hues of oficial di husticia, dependiendo riba cua casonan nan haya. Pero tambe un studiante por dicidi den e di dos semester di e di 3 aña pa sigui nan estudio den exterior. Sra. van Bogeart a subraya cu si studiantenan dicidi di bay studia afo, Universidad di Aruba ta conecta cu e programa Europeo Erasmus+. “Pues bo ta haya un suma paga pa bay studia y tambe bo ticket di buelo ta wordo paga”. E programa pa bay studia afo tambe ta wordo ofreci durante e aña di e programa di masters.
En caso cu studiantenan no bay afo nan lo tin mag di scoge cua materianan nan lo kier tuma mientras nan ta cabando nan estudio. “E minors nan aki te hasta tin opcionnan den Ingles, pa esnan cu interes den tematicanan mas internacional”. Pa esnan cu dicidi di bay studia afo, e studiantenan aki lo tin cu traha un Bachelor tesis y defende esaki den exterior.
Studiante ta central
Biniendo bek na e puntonan cu ta atrea studiantenan pa studia ley na Aruba, sra. Bogeart ta splica cu no tin obstaculonan entre studiantenan y docente. “E no ta manera na Hulanda of otro paisnan unda bo tin un klas yen cu 100 hende of mas y un docente ta para dilanti ta hiba un discurso dilanti. Na nos universidad nos ta para pa interactividad”.
Sinembargo aunke e studiante ta para central den e organisacion, esaki tambe kiermen cu studiantenan tin cu participa di manera activo den e klasnan y tambe e universidad ta spera cu e studiantenan lo studia hunto entre nan mes. “Nos ta mira personanan cu ta crece masha hopi durante nan estudio y esaki ta algo cu nos ta curasha masha hopi. Algun ta drenta cu miedo pa puntra un simpel pregunta y ta caba cu evaluacion Cum Laude”.
Motivacion di publico
Un hoben cu a presencia e presentacion di e facultad a expresa di tin interes den e estudio pasobra ‘mi semper tabatin interes den leynan y con pa haci cosnan corecto. Alabes mi conoce hopi hende cu ta wordo perhudica pa proceduranan legal y en general mi ta kere na Aruba no tin un bon conocemento di bo derechonan como ciudadano’.
Un señora a comenta cu el a haya e anochi informativo un bon oportunidad pa haya mas informacion kico tur un estudio na nivel universitario por brind’e. “Mi tabatin hopi aña ta pensa cu mi kier cuminsa un estudio pero nunca mi a haci’e. Awo cu mi tin mas informacion mi tin mas claridad y un motivacion pa cuminsa”. Te hasta hobennan cu no ta sigur di kico nan lo kier studia a presenta.
Un señora cu ta interesa den defende derechonan di mucha, bestia y derechonan humano a conta cu e kier specialisa den e 3 ramonan di derecho aki. “Mi tin un par di aña ta traha cu organisacionnan activista y p’esey mi kier a bin pa haya sa kico e rekisitonan ta pa drenta e universidad”.
Un studiante cabando su Masters den Tourism Destination Management na Hulanda a splica cu e tin interes pa haci un estudio di ley pa asina combina e aspecto turistico y huridico di e dos estudionan. “Mi kier wordo emplea den ministerio pa asina traha riba maneho pa turismo”.
Rekisitonan
Sr. Santos do Nascimento a clarifica kico e rekisitonan pa por wordo admiti na e facultad ta: un propodeuse di un scol na nivel di HBO, diploma di VWO, 4 deelcertificaat na nivel di VWO of tambe por haci e Colloquium Doctum. Esaki ta e examen cu ta duna chens pa esnan cu tin mas cu 21 aña wordo admiti na e scol. “Mientras tur hende su motivacion ta diferente, nos tin rekisitonan specifico pasobra nos mester por comproba cu bo ta na nivel pa por sigui un educacion na nivel universitario”
Aunke e universidad ta spera cu den futuro nan lo ofrece estudionan part-time, en principio tur e estudionan na e universidad ta full-time. “Pues si bo tin un trabou full-time bo tin cu hinca un averahe di 40 ora pa siman den e estudio aki tambe, mescos cu un trabou fiho. Esaki no kiermen cu bo ta haya 40 ora di les, si no cu bo mester hinca asina hopi tempo den bo estudio en general”.
Experiencia di un studiante den di 3 aña
Sra. Tromp, kende ta cabando su Bachelor den derecho Arubano a conta e publico cu el a haya su mes enfrenta cu hopi reto ora el a cuminsa su prome aña. “Un punto cu tabata hopi claro ta cu mi nivel di Hulandes tabata na werki. Pero si e nivel di Hulandes ta kico ta wanta bo atras pa dicidi cu bo kier cuminsa un estudio di ley akinan, mi lo conseha pa haci’e toch. Kinan bo lo siña”.
Te hasta sra. Tromp ta conseha esnan cu no tabata e miho studiante na Colegio Arubano por ehempel pa purba cuminsa un estudio toch. “E persona cu ta rush 1 dia prome cu examen tabata ami. Pero mi tin cu bisa cu kinan cosnan ta cambia. Kinan ta bo mesun interes ta mustrabo e caminda. E ta bo passion y bo futuro”.
Sra. Tromp a conta cu el a haya chens pa bay Hulanda y representa Aruba den un competencia entre huristanan studiante. “Aunke mi competencia tabata mas experiencia cu mi, y mi tabata esun mas jong, mi a logra haya di dos luga pa Aruba. Mi ta masha orguyoso di e logro aki. Loke mi kier bisa ta cu e estudio aki por habri porta pa bo si e ta bo passion”.
Despues di esaki sra. Tromp a haya un stage na Ministerio Publico. “Mi tabatin mag di bay hunto cu e oficiernan y mi mester a lanta den madruga pa bay accionnan pa haya arma y droga. P’ami esaki tabata surreal mirando cu mi tabata un mucha muhe di 19 aña. Tambe mi tabatin mag di bay cu polis, kustwacht, den helicopter. Tur esaki pa un competencia cu mi a haci”.
Entre otro, sra. Tromp a splica cu ora bo studia ley na nivel di masters no solamente bo tin chens di bira hues of abogado. Si no tambe por bira compliance officer na banco y hurista na diferente compania of departamento di gobierno. “Mundo ta draai rond di leynan, pues cu ley bo lo tin semper porta habri unda cu bo bay”.
