(AP) – Facebook ta bisa cu e no ta morto. Facebook tambe kier pa bo sa cu e no ta “solamente pa hende bieu,” manera hopi hobennan tin aña largo ta bisa.
Awo, cu e competencia mas grandi TikTok enfrentando critica di gobierno den medio di tension cu ta crece entre China y Merca, Facebook posiblemente por posiciona su mes como un alternativa domestico y viabel.
E unico problema ta cu adultonan hoben ya caba a sali for di e plataforma.
“Mi no ta corda cua ta e ultimo biaha cu mi a usa Facebook, E mester a ta varios aña atras,” Walsh di 24 aña a comenta.
Na luga di usa Facebook, e ta usa Instagram mas o menso 5 pa 6 biaha pa dia. Tambe tin TikTok unda e ta pasa mas o menos un ora pa dia ta mira video y lagando e algoritmo haya videonan cu “mi no tabata sa mes cu mi ta interesa aden.” Walsh no por imagina un mundo unda Facebook, na cual el a uni ora cu e tabata den klas 6, lo bira un parti regular di su bida atrobe.
“E ta e fama cu e tin, toch? Ora mi ta pensa riba Facebook, mi ta pensa riba hendenan di edad avansa manera mayornan cu ta publica potret di nan yiunan, publicacionnan di nan bida diario y hende ta discuti tocante problemanan politico,” Walsh a expresa.
E plataforma cu antes tabata e moda ta yega na dos decada den existencia. Pa esunnan cu a cuminsa haci uso di e plataforma ora cu Mark Zuckerberg a lansa thefacebook.com, e ta un parti integro di nan bida diario, aunke e ta den e background actualmente.
Facebook ta enfrenta un desafio un poco peculiar. Awe, 3 biyon persona ta haci uso di esaki pa luna. Esaki mas cu un tercer parti di e poblacion di henter mundo. Y 2 biyon persona ta haci uso di esaki tur dia. Sinembargo, toch e ta haya su mes den un posicion unda e tin cu bataya pa su relevancia y su futuro despues di dos decada den existencia.
Pa generacionnan mas hoben, ta algo dicidi cu e no ta e luga pa ta mas. Sin e grupo aki di usuario cu ta crea e modanan, Facebook, aunke te ainda ta e fuente principal di ganashi pa Meta, ta den riesgo di cay atras.
