Cientifico lider pa inteligencia artificial na Facebook, Yann LeCun, ta splica con e kier pa mashin siña mediante observacion, manera baby ta haci.

Den e prome lunanan di bida, baby ta siña con mundo ta traha door di mira kico tin nan dilanti, LeCun a bisa. Nan ta siña cu obhetonan ta tridimensional y por wordo scondi. LeCun ta nota cu babynan ta siña cu si e obheto no tin sosten, e lo cay.

“Nos lo kier pa sistemanan di inteligencia artificial (AI pa su siglanan na Ingles) siña con mundo ta traha mediante observacion pasobra esey lo tin un implicacion enorme”, el a bisa. “Lo permiti mashin pa tin un nivel di sentido comun.”

E team di investigacion AI di e gigante di rednan social ta pushando computernan mas cerca di e gol aki, siñando nan pa completa tareanan sin depende pa humanonan label of selecta data. E maneho, conoci como ‘aprendisahe auto-supervisa’, tin potencial di mehora Facebook, incluyendo moderacion di contenido. Team di AI di e red social a bisa diahuebs cu a logra un ‘breakthrough’ den e esfuerso, na momento cu su modelo di vision di computer auto-supervisa, conoci como Seer (SElf supERvised) tabata capaz di siña di un biyon di imagen di Instagram aleatorio, sin label y sin cura.

Despues di siña di e imagennan aki, Seer a identifica y categorisa corectamente e obheto dominante den potret cu un tasa di precision di 84.2%. Seer a supera e miho sistemanan auto-supervisa existente cu un punto porcentual, segun e estudio.

E hallazgonan ta un ‘breakthrough mayor cu na final ta habri caminda pa modelonan di vision di computer mas flexibel, preciso y adaptabel den futuro’, segun un blog post compañando e estudio.

Reconoce y categorisa imagennan corectamente lo por yuda mehora un variedad di producto. Facebook y otro rednan social ta usa AI pa clasifica contenido riba feednan, y marca imagen y videonan cu ta viola nan reglanan contra discurso di odio y hende sunu. AI ta ser usa den auto pa yuda chauffeurnan evita accident y den creacion di imagennan medico pa simplifica diagnostico. Facebook, cu tin plan pa lansa e prome par di bril ‘smart’ e aña aki, tambe ta usa AI den su sistemanan di realidad aumenta y virtual pa track e posicion di un persona den un area.

“E bentaha di aprendisahe auto-supervisa ta cu bo por train rednan hopi grandi y ainda ta precies”, LeCun a bisa.

Imagennan online por ta dificil pa un mashin reconoce pasobra nan por ta wazig of saca di angulonan straño. Si mashinnan ta capaz di siña riba nan mes, nan por adapta na e circunstancianan aki.

Aprendisahe auto-supervisa posiblemente por reduci prehuicio cu a aparece den algun investigacion AI, LeCun a bisa. Por ehemplo, algun estudio a mustra cu sistemanan di reconocemento di cara ta haya mas dificil pa identifica minorianan corectamente, posiblemente pasobra investigadonan ta usa setnan di potret cu ta inclui mas hende blanco. Elimina e elemento di clasificacion humano por reduci algun di e prehuicio, el a bisa, advertiendo cu su teoria ta ‘un tiki speculativo’.

Mientras entrena mashin pa ta mesun inteligente cu humano por duna espacio pa preocupacion cu AI lo ta mas inteligente cu humano, esey no ta un futuro pa cual LeCun ta preocupa. Inteligencia, e ta nota, no ta conecta cu un deseo di tuma mundo over.

“E deseo pa domina otro entidadnan ta hardwire den naturalesa humano”, el a bisa, “pero no tin absolutamente ningun motibo pa hardwire esaki den nos sistema AI of robot.”