Facebook a bisa den weekend cu a suspende ‘decenas di miles’ di app, traha pa alrededor di 400 desaroyado, como parti di un investigacion despues di e scandal di Cambridge Analytica.
E anuncio a yega e mesun dia cu documentonan legal na Massachusetts a revela cu Facebook a suspende 69 mil app. Sinembargo, den mayoria di e casonan, e suspension no a yega despues di ningun sorto di investigacion serio, sino pasobra desaroyadonan di e app no a responde na peticion pa informacion via email.
Cuminsando na maart 2018, Facebook a cuminsa investiga app cu tin acceso na data di usuario. E investigacion a bin despues di revelacion di cu e app di mineria di data, Cambridge Analytica, a uza data cu a adkiri di forma inapropia for di miyones di usuarionan di Facebook mediante un app, y despues a uza e data pa purba influencia eleccion presidencial na Merca.
Den weekend, Facebook a bisa cu su investigacion riba app ta andando y a investiga miyones di app te awo. E compania a bisa cu a prohibi algun app completamente y a demanda algun otro, incluyendo na mei contra Rankwave, un compania di analitica di data Sur Koreano. Na april, a demanda LionMobi, basa na Hong Kong, y JediMobi, basa na Singapore, cual e a compania a bisa a traha app cu ta infecta celular di usuarionan cu malware.
Tambe diabierna, un hues a habri un citacion di fiscal general di Massachusetts exigiendo e red social pa revela nomber di e desaroyadonan di app cu a obtene data di nan usuarionan sin permiso. Tambe a pidi pa tur comunicacion interno di Facebook tocante e appnan en cuestion.
E citacion tambe ta bisa cu Facebook a informa di fiscal general di Massachusetts cu a identifica como 2 miyon app ‘cu mester examina mas di cerca pa potencial mal uzo di data di usuario di Facebook’. Esey ta sugeri cu cinco aña pasa, mas di un di cada cuater app por a haya acceso na data di usuario di Facebook sin nan conocemento ni permiso.
