(CNET) – Rednan social a bira un sede pa extremismo mientras discurso politico a aumenta den añanan recien, pa loke Facebook awo ta puntra si bo ta preocupa cu bo amigo- of conocidonan riba e red social ta birando extremista.
E gigante di rednan social a cuminsa duna ‘prompts’ na algun usuario na Merca haciendo e pregunta specifico aki, un vocero di e compania a bisa diahuebs. Tambe a cuminsa notifica personanan cu por tabata exponi na contenido extremista, segun screenshotnan comparti riba Twitter.
Un di e alertanan, comparti riba Twitter, ta puntra: “Bo ta preocupa cu un persona cu bo conoce ta birando un extremista? Preveni extremismo riba Facebook ta importante pa nos. Otronan den bo situacion a ricibi sosten confidencial.” Otro alerta ta bisa: “Gruponan violento ta purba di manipula bo rabia y decepcion. Bo por tuma accion awo pa protege bo mes y otronan.” Ambos alerta tin un link pa recursonan pa ayudo.
Facebook, Google y Twitter pa varios aña ta bao presion pa elimina contenido extremista for di nan plataformanan prome cu e violencia lek den mundo real, pero e enfoke aki a intensifica e aña aki memey aumento di scrutinio pa e rol cu e plataformanan a hunga den e insureccion mortal na e US Capitol na januari.
E programa piloto ta parti di e Redirect Initiative di Facebook, cu tin meta pa combati extremismo violento riba e website door di redirigi hende cu ta busca terminonan di odio of relaciona cu violencia na recursonan educativo y gruponan di alcance.
“E test aki ta parti di nos trabao mas amplio pa evalua formanan pa duna recurso y sosten na hende riba Facebook cu por a haya contacto cu of tabata exponi na contenido extremista, of por conoce un persona cu ta den riesgo”, segun un vocero di Facebook a bisa den un declaracion. “Nos ta asociando cu NGOnan y expertonan academico den e espacio aki y ta spera di tin mas pa comparti den futuro.”
Facebook a bisa cu e programa ta parti di su compromiso na Christchurch Call to Action, un partnership internacional entre gobiernonan y companianan tecnologico cu ta busca pa combati contenido extremista violento online despues di e masacre di 51 persona na un moskee na New Zealand cu a wordo transmiti en bibo.
Facebook a bisa na februari cu mester a elimina un cantidad aumenta di contenido den di cuatro kwartaal pa violacion di reglanan contra discurso di odio, acoso, persona sunu, y otro tipo di contenido ofensivo. A bisa cu a tuma accion contra 26.9 miyon pida di contenido di discurso di odio, un aumento riba e 22.1 miyon den tercer kwartaal.
Pero tambe a bisa cu e porcentahe di biaha cu un usuario ta mira lenguahe di odio, hende sunu y contenido grafico y violento riba su plataforma ta disminuyendo. Tin entre shete pa ocho views di contenido di odio pa cada dies mil views di contenido, Facebook a bisa.
