Facebook ta bisa cu ta prohibiendo videonan ‘deepfakes’, e clipnan falso pero realistico crea cu inteligencia artificial y hermentnan sofistica, mientras ta aumenta esfuersonan pa combati manipulacion online. Pero e politica ta laga cantidad di ambiguedad.
E red social a bisa dialuna cu ta reforsando su politicanan pa elimina video edita of sintetisa den maneranan cu no ta aparente na e persona comun, y cu lo por gaña un persona pa pensa cu e persona riba e video a bisa of haci algo cu en berdad e no a haci ni bisa.
Crea pa inteligencia artificial (AI) of aprendisahe di mashin, deepfakes ta combina of reemplasa contenido pa crea imagennan cu ta casi imposibel di confirma cu no ta autentico.
“Mientras e videonan ainda ta poco comun riba internet, nan ta presenta un reto significante pa nos industria y sociedad mientras nan uzo ta aumenta”, vice presidente di maneho di politica global di Facebook, Monika Bickert, a bisa den un blog.
Sinembargo, el a bisa cu e reglanan nobo no lo inclui parodia of satira, ni clipnan edita djis pa cambia orden di e palabranan. E excepcion ta subraya e acto di balans cu Facebook y otro rednan social ta enfrenta den nan lucha pa stop diseminacion di informacion falso online y ‘fake news’, mientras tambe respeta discurso liber y evadi acusacion di censura.
E compania Mericano ta luchando con pa maneha e aumento di deepfakes despues di ricibi critica aña pasa pa nenga di elimina un video altera di speaker di congreso Nancy Pelosi cu dificultad pa papia, cual a ser mira mas di 3 miyon biaha. Expertonan a bisa cu e clip tabata mas un ‘cheap fake’ cu un deepfake.
Despues un par di artista a post imagen falso di CEO di Facebook, Mark Zuckerberg mustrando e gabando di su dominio di mundo. Facebook tambe a laga e clip aki online. E compania a bisa cu ningun di e videonan aki tabata viola nan politica.
E problema di videonan altera ta tumando urgencia mientras expertonan y legisladonan ta purba di preveni deepfakes di ser uza pa interferi den eleccion presidencial Mericano na november.
E politica nobo ta un ‘punto di salida fuerte’ pero no ta aborda problemanan amplio, segun Sam Gregory, director di programa na Witness, un nonprofit trahando pa uza tecnologia di video pa derechonan humano.
E problema mas amplio ta cu ta mustra video sea sin contexto of edita levemente, cual algun ta yama ‘shallow fakes’, segun Gregory. Esaki ta inclui e clip di Pelosi, of un cu a circula siman pasa di candidato presidencial democrata Joe Biden, edita selectivamente pa parce mustra cu el a haci comentarionan racista.
Gregory, kende a duna feedback na Facebook riba e politica, a bisa cu tin pregunta con efectivo e compania lo ta den descubri videonan sintetico. Facebook a construi aligoritmonan pa detecta deepfakes, y tambe mira comportamento di un cuenta pa haya un idea si su intencion ta pa disemina informacion. Esaki lo duna e compania un bentaha riba usuarionan of periodistanan pa combati esakinan, segun Gregory.
Facebook a bisa cu cualkier video, sea deepfake of real, lo ser elimina si esaki viola standard existente pa hende sunu, violencia grafico of lenguahe di odio. Esunnan no elimina ainda por ricibi revision di fact-checker independiente, y esunnan considera falso lo ta marca asina pa hende cu ta purba di mira of comparti nan. Bickert a bisa cu si simplemente elimina videonan falso, esakinan lo ta disponibel ampliamente na otro paginanan of den ecosistema di rednan social. Pero door di marca nan como falso, ta duna hende contexto y informacion importante.
