Facebook ta bisa cu ta eliminando su prohibicion riba avisonan politico y di asuntonan social, cu a pone na luga despues di eleccion presidencial 2020 na Merca.
Candidatonan politico, gruponan y otronan ta bay tin opcion di pone aviso riba Facebook y Instagram cuminsando awe.
Restriccion di aviso politico despues di eleccion na november tabata entre e cantidad di medida cu Facebook a pone na luga aña pasa den un intento pa sigura cu no ta usa su plataforma pa sembra caos y plama desinformacion.
Facebook a stop avisonan politico di Merca na momento cu e urnanan a cera dia 3 di november, un extension di un restriccion anterior riba aviso politico nobo den e siman conduciendo na Dia di Eleccion. A bisa e tempo aya cu e prohibicion ta bay ta temporal, pero no a duna un fecha pa e fin.
“Nos a scucha hopi feedback tocante esaki y a siña mas tocante avisonan politico y electoral durante e ciclo di eleccion aki”, e compania a bisa den un blog post diaranson. “Como resultado, nos tin plan pa usa e proximo lunanan pa tira un bista mas cercano riba con e avisonan aki ta traha riba nos servicio pa mira unda tin merito pa haci mas cambio.”
Twitter a prohibi aviso politico permanentemente.
