Facebook a bisa cu a elimina cantidad di grupo, cuenta y paginanan vincula cu QAnon, tumando accion pa prome biaha contra e teoria di conspiracion di ultraderecha Mericano, circula entre sostenedonan di presidente Donald Trump.
E gigante di red social a haci e anuncio ayera como parti di su sesion di informacion mensual riba ‘comportamento inautentico coordina’ riba su plataforma. Esey ta e termino di Facebook pa cuentanan falso maneha cu intencion di afecta eleccion politico y sociedad.
Ademas di e cuentanan di QAnon, Facebook tambe a elimina cuentanan vincula cu VDARE, un website Mericano conoci pa post contenido anti- inmigracion, como tambe cuentanan na Rusia, Iran, Mauritania, Myanmar y e pais Georgia.
QAnon ta un teoria di conspiracion centra riba e creencia cu Trumpta conduciendo un campaña secreto contra enemigonan den e ‘deep state’ y un ring di traficacion sexual di mucha maneha pa pedofiel satanico y canibal. Pa mas di dos aña, siguidonan ta examina un cantidad di pista cu ta post online intencionalmente pa un oficial di gobierno di alto rango, conoci solamente como ‘Q’.
E teoria a aparece prome na un skina scur di internet, pero ta drentando e coriente principal di arena politico. Trump a retweet cuentanan cu ta promove QAnon y su siguidonan ta yega e rally di e presidente bisti cu paña y pechi cu simbolo y slogan di QAnon.
Facebook ta bisa cu a haya e actividad di QAnon como parti di su investigacionnan riba locual ta sospecha ta comportamento inautentico coordina prome cu eleccion presidencial 2020.
Compania di investigacion di rednan social Graphika, cu ta ricibi fondonan di Facebook, a bisa den un reporte ayera cu e red QAnon tabata promove teorianan di conspiracion y purba di bende mercancia, manera t-shirt, usando Facebook. E red, Graphika a bisa, ta parce di ta maneha pa un grupo chikito di usuario cu tin cuentanan tanto real como falso.
E red a enfoca principalmente riba ‘Q’, pero tambe a presenta otronan – rond di red wireless 5G, eleccion presidencial Mericano, Bill Gates y coronavirs, Graphika a bisa. E compania di investigacion a haya actividad relaciona riba Twitter tambe, pero a nota cu di su mes, actividad asina por no a viola reglanan di Twitter. Twitter ta permiti usuarionan post bou nomber falso.
