Facebook a elimina casi 200 cuenta di rednan social vincula na gruponan di supremacia blanco cu tabatin plan di curasha miembronan pa presenta na protesta tocante brutalidad policial contra hende color scur – den algun caso cu arma, segun oficialnan di e compania.
E cuentanan riba Facebook y Instagram tabata vincula na Proud Boys y e American Guard, dos grupo di odio ya prohibi riba e plataformanan. Oficialnan ya tabata monitor e cuentanan den preparacion pa su eliminacion na momento cu a mira e post purbando di explota e protestanan andando impulsa pa morto di George Floyd na Minneapolis.
E compania no a revela detaye di usuarionan di e cuentanan – manera nan plan specifico pa protesta of unda na Merca nan ta biba. A bisa cu ‘aproximadamente’ 190 cuenta a ser elimina total.
Tanto Proud Boys como American Guard tabata prohibi di Facebook pa violacion di regla prohibiendo lenguahe di odio. Facebook a bisa cu lo sigui elimina pagina, grupo of cuentanan nobo crea pa usuarionan purbando di evadi e prohibicion. Facebook tambe a anuncia eliminacion di un cantidad chikito di cuenta crea pa supremacistanan blanco ken tabata pretende riba Twitter di ta miembro di e movemento iskierdista Antifa.
Facebook a anuncia dos otro accion pa elimina red di cuenta falso usa pa manipula opinion publico riba Irak y Africa.
Centenares di cuenta falso crea na Tunisia den un supuesto intento di influencia eleccion na e pais aki y otro nacion di habla Frances den Africa sub-Sahara. E cuentanan tabata impersona ciudadano local y organisacion noticiero, cu mas di 3.8 miyon persona siguiendo un of mas di e paginanan, y mas di 171mil persona a sigui un di e cuentanan riba Instagram.
E red di cuenta y pagina falso a ser descubri pa e Digital Forensic Research Lab di Atlantic Council.
Facebook tambe a desactiva otro red di 102 cuenta falso usa pa impersona politico local y organisacion noticiero den e region Kurdo na nort di Irak. Oficialnan di e compania a bisa cu e cuentanan falso, cual tabata parce enfoca riba audiencia domestico na Kurdistan, tabata vincula na servicio di inteligencia Kurdo.
