Facebook a lansa un caracteristica nobo, cu ta permiti bo elimina un mensahe despues cu esaki a wordo manda, manera a wordo mira anteriormente via lek. Pues den caso cu bo a manda e mensahe robes pa e persona robes of haci un typo mahos, awo bo lo por kita e mensahe riba Messenger.
E ta traha ora bo tap riba e mensahe cu bo kier elimina, dentro di 10 minuut despues di mand’e. Dos opcion lo aparece: ‘Elimina pa tur hende’ y ‘elimina pa mi’. Similar na Whatsapp, si selecta ‘elimina pa tur hende’, e mensahe ta wordo cambia pa un texto bisando cu bo a elimina e mensahe.
Esaki ta similar na e poder cu CEO Mark Zuckerberg famosamente tin di elimina mensahenan cu el a manda, manera nos a haya sa pa prome biaha april ultimo, despues cu varios fuente a nota cu mensahenan cu nan a ricibi di e CEO a disparce misteriosamente. Respondiendo na preguntanan, Facebook a confirma cu e mensahenan di Zuckerberg tabata caduca, citando medidanan di siguridad mas estricto despues di e hack di emailnan di Sony Pictures na 2014.
Despues cu hende a haya sa cu Zuckerberg (y probablemente, otro ehecutivonan tambe) por a elimina mensahenan pero e usuario normal no por, nan a critica Facebook pa duna tratamento preferencial. E mesun dia, Facebook a anuncia cu lo construi un caracteristica di ‘unsend’ pa tur usuarionan den e proximo lunanan, y lo limita e habilidad di Zuckerberg di uz’e te ora tur hende haya acceso.
Facebook a bisa The Verge cu e caracteristica nobo lo tabata disponibel desde ayera riba e versionnan mas nobo di Messenger pa iOS y Android. E compania a bisa cu e habilidad nobo ta basa riba e poder di Zuckerberg, pero el a pasa den ‘algun mehoracion pa duna un funcionalidad mas amplio pa hendenan uzando Messenger’.
