Facebook ta yegando mas cerca di desaroya su propio cryptomoneda, pa bo por manda bo amigonan. E gigante di rednan social supuestamente a crea un compania na Suisa, pa enfoca riba pagonan y blockchain, e tecnologia tras di cryptomonedanan manera Bitcoin.
Un cryptomoneda di Facebook lo ta mara na e dollar Mericano, segun e publicacion Suiso, Handelzeitung a bisa, y pa e motibo aki por permanece stabiel, a diferencia di Bitcoin, cu a cuminsa cay na 2017.
Facebook a establece Libra Networks na Geneva algun siman atras, Handelzeitung a bisa, notando cu Libra ta e nomber pa e proyecto interno di moneda digital di e red social.
E compania Suiso ta propiedad di Facebook Global Holdings II na Irlanda, e reporte ta bisa, y lo enfoca riba desaroyo di software y hardware pa funcionnan relaciona cu moneda, manera pago, blockchain, analitica, big data, y maneho di identidad.
Facebook a nenga di duna comentario, pero e reporte ta bin despues di un storia di The New York Times na februari, cu Facebook tabatin un team di 50 persona trahando riba su moneda virtual, cu lo wordo uza riba e red social y su servicio di mensahe, WhatsApp.
E tempo ey, Facebook a nenga di comenta riba plan actual, pero a confirma cu ta trahando riba sistema di blockchain. “Manera hopi otro compania, Facebook ta explorando manera pa uza tecnologia di blockchain”, e compania a bisa den un declaracion. “E team nobo aki ta explorando varios aplicacion.”
Blockchain ta un tecnologia di encripcion cu ta construi un set di bloki di data, grabando transaccionnan y ken a haci nan. Ningun partido ta controla e data, cual ta decentralisa.
