ESTADONAN UNI (CNET) – E red social ta defende su practica di contrata contratistanan pa modera contenido, maske e ta admiti cu tin espacio pa mehoracion.

Facebook ta enfrenta preocupacion creciente tocante e salud mental di contratistanan cu ta pasa door e pagina buscando lenguahe di odio, violencia y pornografia, hasta ora e red social ta enforsa su esfuersonan pa controla contenido ofensivo.

Dialuna, Facebook a defende e uzo di contratistanan Accenture, Cognizant, y otro companianan. Pero e red social mas grandi di mundo a reconoce cu tin espacio pa mehora e condicionnan pa contratistanan, algun di nan kende supuestamente ta sufri sintomanan similar na desorden di stress post- traumatico.

“Hopi di e preguntanan reciente ta enfoca riba sigura cu hende trahando den e rolnan aki ta wordo trata di un forma husto y respetuoso”, segun Justin Osofsky, VP di Operacion Global di Facebook.

E comentarionan di Facebook a yega despues cu The Verge a reporta cu empleadonan di Cognizant cu ta traha cu e red social a uza sex, droga, y humor preto na pia di trabou pa por haci nan trabou revisando contenido manera suicidio y violencia. Algun di e empleadonan aki a cuminsa kere den teorianan di conspiracion haya den e videonan cu nan ta modera. E empleadonan di Cognizant ta gana como $28,800 pa aña segun e reporte.

Un ex- empleado a bisa e publicacion cu el a cuminsa kere den teorianan di conspiracion despues di modera e contenido ey. Tambe el a bisa cu e ta hiba un arma di candela trabou y ta drumi cune, pasobra empleadonan despedi a menasa nan ex- colega. Empleadonan ta wordo duna ‘wellness time’ y breaknan, pero empleadonan a bisa cu e recursonan aki no ta adecua. Pa maneha e stress laboral, algun empleado a haci sex den baño, trapi y otro luga na pia di trabou, segun e reporte.

Un vocero di Cognizant a bisa den un declaracion cu e compania ta duna sosten na su empleadonan mediante terapistanan na e sitio, un programa di bienestar, y otro hermentnan.

E reporte ta e mas recien den adresa e preocupacion tocante con e red social ta modera contenido. Aña pasa, un moderador a demanda Facebook, acusando cu e compania no a haci suficiente pa proteha e salud mental di e trahadonan. Noticieronan, incluyendo Wired, Motherboard y The Wall Street Journal tambe a reporta tocante e lucha di e moderadonan pa maneha contenido perturbador.

Facebook a purba di sigura empleadonan cu nan ta tumando pasonan pa drecha e situacion.