Un cantidad di documentonan interno a revela con Facebook tabata preocupa cu muchanan tabata gasta un cantidad grandi di placa riba pagonan den app, sin permiso di nan mayornan – pero aparentemente a dicidi di no actua.

Discusionnan a mustra cu e compania a dicidi di no implementa cierto salvaguardia, como cu e lo afecta ganashi general di hendenan pagando pa weganan. E documentonan ta forma parti di un demanda cu a wordo resolvi na 2016, despues di cual Facebook a bay di acuerdo pa cambia su practicanan. Entre februari di 2008 y juni 2014, Facebook a bisa cu el a gana tiki mas cu $34 miyon di cuentanan perteneciendo na menornan di edad na Merca.

E informacion a wordo teni bou seyo, te ora e Center for Investigative Reporting recientemente a haci un peticion pa haci esakinan publico. Siman pasa, un hues a duna orden na Facebook pa entrega e material extra, cual el a haci diahuebs ultimo. E documentonan ta mustra discusionnan entre empleadonan di Facebook, tocante con pagonan den app ta tuma luga riba e plataforma, y si muchanan lo por ta gastando placa real sin sa, durante weganan. Tara Stewart, un analista di riesgo pa Facebook, a remarca cu e placa den e wega hopi biaha ‘no necesariamente ta mustra manera placa di berdad pa un menor di edad’.

E investigacion a wordo motiva pa desaroyado di wega di Finlandia, Rovio, kende a bisa Facebook cu nan a ripara un ‘tasa di reembolso alarmantemente halto’ causa pa locual ta conoci como ‘fraude amigabel’. E termino tipicamente ta referi na instancianan unda mayornan a haya sa cu un mucha ta uza nan credit card pa cumpra funcionnan of complementonan den e wega.

Facebook a considera cu tabata ‘realmente importante pa Angry Birds ta un storia di exito’ – referiendo na e wega hit di Rovio – y pues a investiga kico tabata causando tanto peticion di reembolso. “Den casi tur caso, e mayornan tabata sa cu nan yiu tabata hunga Angry Birds, pero no a pensa cu e mucha lo wordo permiti pa cumpra algo sin nan contraseña of autorisacion”, segun un memo skirbi pa empleado di Facebook Danny Stein.

Stein a continua bisando cu e compania lo por construi un metodo automatico cu lo por reduci e problema, pero cu e lo ‘mas probablemente blokia un volumen total di pago’. Mientras cu Facebook no a desaroya e weganan en cuestion, pagonan a wordo haci mediante su sistema, cual na e momentonan ey no tabatin medidanan di siguridad adicional rekeriendo mayornan pa re- verifica nan carchi si nan yiu tabata gasta mas placa. Facebook ta tuma 30% di e pagonan, y e desaroyado di e wega ta tuma e resto.

Facebook a considera cambia su sistema, pa asina usuarionan bou edad di 17 (y ariba di 90), kende purba di haci transaccionnan riba $75, lo mester duna e prome seis number di e credit card cu tin riba nan perfil, pa demostra cu nan tin e carchi of sikiera por corda. Facebook no a implementa e idea.
Como parti di e acuerdo di 2016, Facebook a paga $5mil na cada famia di e dos muchanan cu a acumula un cobransa enorme sin conocemento di nan mayornan.

Un di e muchanan, di 12 aña di edad, tabata hunga Ninja Saga y eventualmente a gasta $610.40 prome cu su mama, sra. Bohannon, a wordo adverti pa e compania di su credit card. Segun Bohannon, e wega tabata keda bis’e pa keda click pa regenera, y e mucha no a compronde cu cada biaha cu e click, tabata cobra e credit card. Den un declaracion, Facebook a bisa cu e ‘ta traha cu mayornan y expertonan pa ofrece hermentnan pa famianan nabegando Facebook y internet’.