Otro aña ta eleccion pa pueblo scoge un parlamento y gobierno nobo. Un punto importante pa e proceso di eleccion canando un caminda transparente ta e financiamento di partido politico. Sinembargo esaki ainda no ta regla.
Na 2013 prome minister Mike Eman a haci e promesa cu lo bin cu un ley pa campaña politico y financiamento di partido politico ‘dentro un par di siman’. Awor tres aña despues e ley no a yega parlamento ainda ni wordo trata. Prome cu esaki tabatin un otro ley pega na parlamento pa hopi aña pa regla e mesun asunto. Sinembargo no tabatin consensus bou di e partidonan politico grandi di AVP y MEP pa pusha y atende e ley aki.
Awor cu e eleccion ta den cerca, e movecion pa busca aliansanan pero tambe fondonan ta pleno progreso. Comerciantenan ta reuni cu politiconan pa wak ken lo duna sosten financiero den e siguiente eleccion y asina tambe expresa nan deseonan.
Un otro señal ta cu ministernan ta hopi activo pa busca y tuma personal pa yuda nan riba e tereno di publicidad y preparacion di campaña di eleccion. Tambe por mira hopi actividad riba e partimento di tereno. Manera conoci tin mas cu 11.000 peticion pa tereno y e departamento concerni DIP ya a indica cu no por cumpli cu tur e peticionnan. Tin ciudadano wardando mas cu 10 aña y ainda no a haya un tereno. Sinembargo Bon Dia Aruba a haya informacion cu tin hende cu a haci peticionnan sin mester warda mucho tempo. Un di e persona ta Richard Arends cu a logra di haya un tereno na Malmok. Un otro persona ta e yiu di Franklin Abath, cu ta den e management di DIP, cu tambe a haya e tereno na Malmok sin cu el a entrega un peticion sea pa hopi tempo.
Manera e director di DIP Isabel Dammers a splica Bon Dia Aruba e aña ki, nan ta evalua e peticionnan y despues manda nan cu nan conseho pa minister di Infrastructura, Benny Sevinger. E decision di otorga tereno ta den su man sea e man di su team na ministerio di Infrastructura y no DIP.
E punto di faborece sostenedonan di partido publico na manda, ta un punto cu semper ta critica den cuadro di investigacion di bon gobernacion. Hopi rapportnan a sali riba e punto aki, di Algemene Rekenkamer y di investigacionnan haci na Hulanda manera WODC cu a señal e punto aki como algo cu ta contra e concepto di bon gobernacion y derechonan di ciudadano.
