Fabio Alexander Montilla ta un hobencito di 11 aña di edad cu tin amor pa e deporte di futbol. E ta hunga pa club local RCA y pa Team Dreyer, cu cual recientemente el a biaha pa Colombia pa hunga den e torneo Future Soccer Cup (FSC). Na luna di maart Fabio Alexander tin e oportunidad unico di hunga futbol na Madrid, Spaña, den e Real Madrid Foundation World Challenge Tournament 2023.
Aña pasa Alexander a forma parti di e Real Madrid Foundation Clinic cu a tuma luga na Aruba y a traves di esaki, mirando su talento, dedicacion, disciplina y amor pa futbol, Alexander a ricibi un invitacion pa biaha bay Madrid, Spaña y cumpli un soño cu hopi mucha, y adulto tambe, amante di futbol tin, hunga futbol na e ciudad di Madrid pa e fundacion di un di e teamnan di futbol mas grandi na mundo, Real Madrid.
“Mi ta hopi contento cu mi a haya e invitacion. E ta bay ta un experiencia unico pa mi cu nunca mi lo lubida. Mi ta hopi entusiasma pa hunga na Madrid y por ta hasta wak e hungadornan profesional, si mi tin suerte,” Alexander a conta.
Pa por haci su soño realidad, Alexander su mayornan mester cubri tur gasto pa e por yega Madrid y hunga den e torneo. Bon Dia Aruba a combersa cu e mama di Alexander, Claudia Meriño, ken a splica tocante e gastonan di e biahe.
“E ta hopi gasto, pero nos ta trahando duro pa e logra su soño. E no ta economico, mester cubri tur cos. Nan ta ofrece un pakete cu ta inclui estadia, cuminda, transport ayanan y algun tour, plus uniform y entrada pa e torneo pa e persona cu compañe, pero asina mes e ta hopi gasto y apart di esey mester cumpra e pasashi pa Alexander y su acompañante,” Meriño a splica.
E torneo lo tuma luga desde 31 di maart pa 8 di april. Si cualkier persona of compania ta desea di contribui na e bunita soño di Alexander, por tuma contact libremente cu su mama Claudia Meriño na 7307325. “Cualkier ayudo, cualkier contribucion, no ta importa con grandi of chikito, lo ta altamente aprecia, di curason,” Meriño a finalisa.
