(AP) – Reguladornan federal di seguridad Mericano a bisa cu nan a habri caminda pa Verizon y AT&T cende mas toren pa servicio nobo 5G sin causa interferencia di radio cu avion.
Administracion Federal di Aviacion (FAA) a bisa diabierna cu nan a tuma e stapnan despues di ricibi detayenan di e companianan di telecomunicacion tocante e ubicacion di transmisornan wirteless.
E movida di FAA ta bay permiti e companianan activa torennan di celular 5G cerca di aeropuertonan sin afecta e capacidad di avionnan pa aterisa durante mal tempo.
Verizon y AT&T a nenga di duna comentario. Nick Ludlum, vocero pa e grupo di industria di telecomunicacion CTIA, a yam’e ‘un desaroyo positivo cu ta resalta e progreso considerable di industria wireless, di aviacion, FAA y FCC ta haciendo pa sigura servicio robusto di 5G y vuelonan safe’.
E grupo di industria Airlines for America a duna un declaracion similar. Vocero Carter Yang a agrega cu tur banda ta trahando riba ‘un solucion permanente mas eficiente’ cu ta bay evita di interumpi trafico aereo mientras ta activa mas toren 5G.
Gruponan di aviacion y FAA a adverti anteriormente cu e servicio 5G di e companianan, cu ta usa parti di un spectrum di radio yama C-Band, tabata mucho cerca na e rango di spectrum usa pa instrumentonan cu ta midi e haltura di avionnan riba suelo – informacion crucial pa aterisa ora tin visibilidad pober.
Verizon y AT&T, cu a gasta biyones pa construi rednan 5G, a disputa e conclusionnan di FAA. Pero dos biaha nan a bay di acuerdo pa retrasa lansamento di 5G nobo y temporalmente a retrasa esaki rond di varios aeropuerto hasta mientras nan a cuminsa ofrece e servicio na cantidad di ciudad Mericano dia 19 di januari.
Desde cu e disputa a bin dilanti e luna aki, FAA a aproba mayoria di tipo di avion di aerolinea – 90 porciento di e flota Mericano – pa opera rond di señalnan 5G, bisando cu nan aparatonan pa midi haltura, yama radio altimeters, ta safe di interferencia di radio.
Prediccionnan tragico di miles di vuelo cancela no a materialisa, pero decenas di vuelo si a keda para pa preocupacion pa 5G, incluyendo vuelonan internacional cu destino pa Merca siman pasa, y algun vuelo domestico e siman aki na Paine Field cerca di Seattle. Algun avion chikito, notablemente un grupo di jet regional Embraer, ainda no a ricibi aprobacion. “Ta demasiado trempan a declara victoria”, Faye Malarkey Black, presidente di Asociacion Regional di Aerolinea, a bisa anteriormente e siman aki. “Esaki no ta drecha. Nos no ta drecha.”
Aerolineanan regional – companianan mas chikito cu ta opera vuelonan bao contract cu aerolineanan grandi – tabata enfrenta limitacionnan riba porcionnan grandi di nan flotanan durante mal clima, Black a bisa.
