Ayera mainta F.A.D.A a anuncia dos proyecto nobo, un cu ta trata tocante combersacionnan individual cu hobennan pa haya sa kico ta e problema y otro ta trata di educacion mas innovativo.

Rish-Ann Ammerlaan, trahado preventivo, a splica cu hopi biaha nan ta haya hobennan cu ta yega na F.A.D.A cu por ta cu nan ta experimentando, usa cierto substancianan. Of nan ta adictonan na video gaming, cu F.A.D.A no por yuda nan y tin cu manda pa un otro instancia, cu e mayoria di biaha nan no ta yega na e instancianan ey.

Na e momentonan aki cu nan trahadonan preventivo cu a haya un training intensivo di Hulanda, nan por yuda e hobennan aki manera nan ta yega na F.A.D.A pa nan por wak kico ta e problema di biaha.

Motiver, manera un di e proyecto ta yama, ta un metodo den cual nan por motiva e clientenan desde 14 te 24 aña pa minimalisa of stop e uso di substancianan, video gaming of gambling. Di esaki el a señala cu nan ta tene un combersacion individual, cu a traves di diferente medio di informacion, educacion y dinamica nan ta yuda e hobennan pa baha of detene e problematica.

Rubiella Toppenberg tambe a expresa cu nan ta cla pa sirbi e hobennan cu ta sinti cu tin mester di ayudo. E di dos proyecto cu F.A.D.A a trece dilanti ta yama Learnovate, e cual a specifica cu ta algo nobo cu tur di nan a hinca den otro como un proyecto educativo na un forma innovativo.

Esaki ta nifica cu e personanan lo haya hopi informacion cu lo pasa den rednan social y lo tuma luga 4 biaha pa siman. Pa loke full un luna, tur diaranson esaki por wordo mira den diferente rednan social, na unda lo haya informacion di diferente topico cu tin di haci cu adiccion. Toppenberg a bisa cu e prome luna lo ta di alcohol y droga, di dos luna nan lo toca e parti di video gaming y di tres luna nan lo tin e parti di salud mental.

Tur siman nan lo tin un invitadonan profesional, por ehempel, psicologo, psikiatra, algun docente y otro hoben, na unda e personanan por haci preguntanan pa e profesionalnan aki.

Ademas, Toppenberg a expresa cu nan ta haya hopi hoben cu tin preguntanan, pero nan no sa na unda nan por haya un contesta. Pa loke nan lo invita hobennan den e programa pa asina haci e preguntanan pa e specialistanan.

Loke F.A.D.A kier ta siña e hobennan y otronan interesa den e topiconan di un manera innovativo, pa motibo cu awendia tur persona ta haci uso di tecnologia. Y segun Toppenberg, esaki ta un ‘oportunidad tremendo’. E programa lo tin un duracion di 20 minuut y ta cuminsa dia 12 di augustus proximo.

Tambe nan a menciona cu manera tur aña, nan ta preparando e campaña di Amigodidi hunto cu Fundacion Zinnia, cu nan lo publica den e siman aki. Toppenberg a comenta cu den temporada aki di vakantie. hopi hoben y mayornan ta sali y ta bay keiro, pero a enfatisa cu nan mester haci uso di su Amigodidi, cu ta esun cu e persona ta scoge pa stuur y cu no haci ta uso di alcohol ni di otro substancianan.