Ayera durante un conferencia pa medionan local, Ezzard Cillie, miembro di Hunta Directivo y director di Cuido di Pashent di Hospital Horacio Oduber, a duna un splicacion tocante e problema unda cu departamento di radiologia a keda afecta pa schimmel, e investigacion cu ta andando na laboratorio y situacion di e boiler.

Cillie a expresa cu no ta e prome biaha cu un ‘incidente’ – manera el a yam’e – ta sucede; esey a tuma luga varios biaha, e siman aki atrobe a consecuencia di trabounan cu ta ehecutando y cu ta afecta ‘un parti so’ di departamento di radiologia, no e departamento completo.

Cillie a comenta cu consecuencia di esaki ta cu hendenan ta sinti diferente holo, manera cloro y otro den combinacion cu e trabounan cu ta haciendo. En todo caso, esey no ta bon ni pa pashent ni pa empleado y pa e motibo ey nan mester sali for di e luga y servicio no por sigui.

Di mesun manera, el a comenta cu presidente di sindicato cu a tene un conferencia di prensa dianan pasa a duna di conoce kico ta e problemanan na radiologia y a base di esey nan a tene un reunion cu sindicato y mediador, pa combersa tocante e situacion diaranson pasa y ademas a destaca cu hopi empleado ta bastante fada pa via di e situacion.

E hecho ta, Cillie a expresa, cu nan a purba di drecha di e situacion, pero nan no por a logra. Cada bes e problema ta bolbe, hospital mes no ta esun cu ta experto cu por traha cu e tipo di problema ey. El a sigura cu nan ta dependiente di asistencia di afo, y nan mester laga esaki pa esnan cu a traha e construccion mes, pa nan traha riba e problema.

Den e reunion hunto cu mediador, Cillie a bisa cu e empleadonan a dicidi cu nan ta hiba e asunto na un nivel mas halto di confrontacion y ta yegando e momento cu pa gerencia simplemente esaki no ta aceptabel mas: “Bo no por interumpi servicio medico cada bes pa via di e holo aki; hospital no tin un solucion p’e”, Cillie a señala.

Tambe el a expresa cu ayera nan tabatin un reunion cu minister di Salubridad, Dangui Oduber, pa wak con nan ta bay ataca e problema ey.

Di otro banda, tocante e investigacion di laboratorio, cu ta un posibel caso di fraude, Cillie a contesta cu e mester ta hopi cauteloso cu comentario riba esaki, pa motibo cu huridicamente lo por utilisa e comentarionan contra su persona. Sinembargo, el a expresa cu e investigacion forensico no a caba ainda, nan ta pensa cu esey lo por a keda cla, pero investigadornan a pidi Cillie pa mas tempo, pa motibo cu tin mas evidencia ta sali cu nan no a conta cune y mester sigui investiga mas aleu.

Den su opinion, Cillie a anuncia cu e no tin pura den sentido pa e investigacion caba. Loke e kier ta pa haci un investigacion debido basa riba calidad, unda no lo tin duda di locual a sucede. Tin combersacion y entrevista cu ta tumando luga na Hulanda awor aki relaciona cu e asunto y ora tur cos ta cla, e lo duna un declaracion pa informa kico a sucede.

Cillie a señala cu “mientras cu mi no tin prueba cu bo a haci daño, mi no por culpa bo di nada.” Igualmente el a menciona cu tin dos persona cu ta bao investigacion, pero ta un procedura unda cu legalmente e tin cu keda afo, pero manera el a bisa, “mi no por culpa nan di nada ainda.”

En cuanto e situacion cu e boiler, Cillie a declara cu minister tin e reporte. Ayera tardi den reunion nan lo a papia tocante esaki, pero hospital no tin nada di haci cu esaki. El a splica cu esaki ta un asunto di e compania hunto cu Soga (propietario di e edificio;red.).