Durante e firmamento di contracto colectivo CAO di Hospital Dr Horacio Oduber hunto cu sindicato di trahadonan di cuido ASV y otro instancianan, director Ezzard Cillie a duna comentario tocante e situacion despues di atake cibernetico riba sistema di hospital.
Tocante e atake cibernetico cu hospital ta atravesa den momentonan aki, Cillie a trece dilanti cu aworaki nan tin hopi reto den hospital y cu ohala esey lo por ta un empuhe pa empleadonan, kende ta haci tur lo posibel pa e cuido sigui bay door.
Riba e mesun linea el a menciona cu ta haciendo tur locual ta posibel, cu overtime no ta un problema pa nan pa e hospital por keda draai. Tambe el a destaca cu nan no ta ‘den calamidad’ pero locual ta pasando aworaki, nan a bay cu adelanto asina grandi den ultimo dos aña rumbo pa digitalisacion. Den e mesun dos aña cu nan a bay dilanti, cu sla aki cu nan a haya di atake cibernetico, nan tabatin mala suerte.
Cillie a señala cu nan forma di traha ta parce manera dies aña pasa, tur cos ta cu papel te hasta e-mail nan no por manda y door di esey nan ta uzando recursonan humano pa transporta papel pa e contesta adecua of resultado di laboratorio wordo hiba na man di dokter y asina yuda e pashent.
“Aunke ta un forma anticua di traha, pero nos no tin otro forma, nos mester garantisa e cuido” Cillie a bisa.
Tambe el a destaca cu e cuido ta garantisa, pero esey ta garantisa danki na e empleadonan cu ta den cas. Pa loke ta trata e tempo cu mester warda pa e sistema por keda reestableci, Cillie a manifesta cu nan no sa y esey no ta cla. E ta kere cu lo yega e momento cu nan lo tin cu dicidi cua rumbo nan ta bay.
