Pa hopi aña laboratorio tabata cay bou di gobierno, pero desde cu a firma e traspaso aña pasa esaki a cambia y awo ta cay bou maneho di hospital pero ta haya subsidio di gobierno. Na laboratorio tin trabounan cu ainda falta y cu mester traha riba dje. Ta busca pa duna Aruba e servicio cu mester y pa tur cos ta den un forma responsabel. Tur esunnan cu ta yega na hospital of laboratorio, nan mester sinti cu nan ta wordo yuda y cu e peticionnan ta wordo tuma na serio, segun Director medico di HOH Sr. Ezzard Cilië. Awo cu laboratorio ta cay bou di hospital esaki lo ta extra gastonan pa nan. AZV y hospital a sinta na mesa unda cu nan ta tratando un acuerdo.
Si pa añanan na hospital a custumbra pa mas di 20 aña traha den un forma, cu tal custumber, cu tal procedura manera ta custumbra den gobierno, awo mester compronde cu nan no por paga pa e tipo di esfuersonan ey y cu ta costa nan asina hopi, segun e director. Nan no ta haci esaki pa spaar placa, pero ta haci esaki na un forma eficiente y cu nan por den forma responsabel por bisa pa duna e servicio cu Aruba mester di dje aworaki ta na un manera responsabel y no laga e cosnan mas di loke ta necesario. Tin otro caminda cu nan por aloca e parti financiero.
E forma con hospital ta contesta e telefon, e forma con nan ta ricibi pashentnan ora cu yega eynan, e clientenan mester sinti cu nan ta wordo yuda. Tambe cada ken cu ta nan cliente mester haya e gevoel cu na hospital nan ta serio cu nan peticion. Cada un peticion di e diescinco mil ta uno riba su mes y mester cumpli cu cada un di nan. Antes nan tabata tin mester di calidad pero esey ta e responsabilidad cu hospital tin cu e pueblo.
Cu e sistema aki lo tin extra gastonan pa hospital. Con nan ta bay carga esaki? Segun Sr. Cilië, e gastonan cu hospital tin na e momentonan nan ta den discusion. Esaki ta den un estado hopi leu caba, aunke cu un hende tin cu paga esaki. Antes gobierno tabata percura directamente pa financia y paga e gastonan. Hospital ta tratando un acuerdo cu AZV ya cu nan ta pagando e gastonan cu normal nan ta haci caba. “Pero AZV no ta man los manera nos ta desea,” e director a expresa. Kiermen kico cu hospital haci, mester ta argumenta y hustifica pa nan no gasta loke nan no tin of no por. Pero e ora esaki lo tin cu bin di e presupuesto di laboratorio di AZV cu ta mara na cierto suma.
