Segun informacion di e agencia EFE, e compania Mericano Exxon Mobil, e empresa mas grandi den petroleo y gas na mundo, a anuncia cu e lo ta invertiendo 5.000 miyon dollar den exploracion pa obtene petroleo na Guyana, desde 2020.
E responsabel di Exxon Mobil na Guyana, Jeff Simon, a bisa den un conferencia di prensa na Guyana cu e filial Esso Exploration and Production Guyana Limited (EEPGL) a solicita un licencia di produccion y cu a contrata un compania specialisa den construccion di plataforma flotante.
Desde e plataforma lo saca petroleo di fondo di lama y ta almacena esaki pa ser transporta pa un refineria, prome cu comercialisacion. E plataforma lo tin capacidad di almacenahe te 100.000 bari di petroleo diario, y tambe lo separa gas y awa di e petroleo recogi. Ta spera cu Exxon Mobil lo bora 17 pos di petroleo.
Nota di redaccion
E exploracionnan di Exxon y otro empresanan na Guyana a bay acompaña pa varios problema. Ta existi ainda e conflicto di frontera cu Venezuela cu ta reclama un parti grandi di teritorio Guyanes como su propiedad legitimo, incluyendo e teritorio marino cu ta pertenece na esaki. Na januari 2017 tabatin otro asunto, unda a acusa Exxon Mobil di a financia campaña electoral na Guyana na 2015. Gobierno Guyanes a desmenti esaki. Rex Tillerson, actual secretario di estado den gobierno di Trump, den e periodo menciona tabata CEO di Exxon Mobil.
