Extremismo derechista y racismo ta aumentando na Hulanda, pero atakenan cu motibo racista ainda ta inusual, segun Trouw a reporta ayera.
E corant a bisa cu un patronchi di atakenan cu motibo racial manera na Alemania, unda a registra alrededor di mil incidente violento na 2018, no ta algo cu ta copia na Hulanda.
Consehero di servicio di siguridad local AIVD a bisa cu atakenan asina na Hulanda ta limita na ‘algun decena pa aña’. E tono di e debate sinembargo ta birando mas radical. “E cantidad di comentario racista a aumenta enormemente y tin un cambio den kico ta considera lenguahe normal. Pero e derecha extremo ta parce di keda leu di violencia”, segun Nikki Sterkenburg, investigado PhD di Leiden kende ta studiando extremismo derechista na Hulanda.
Na momento cu activistanan derechista recuri na violencia, manera tabata e caso na aña 2016 tempo cu a tira bom riba un moskee na Enschede, sosten di derecha extremo ta tiki, segun Sterkenburg. “Pafo di Alemania, unda Nazinan tradicional y skinhead ta forma un gran parti di e escena di derecha extremo, Hulanda tin gruponan separa y individuonan solitario. Nan por tuma contacto cu otro riba internet, pero nan no ta organisa.”
Esaki ta haci dificil pa calcula un cantidad, maske polis ta na haltura di un grupo di alrededor di 150 pa 250 persona cu ta atende charla of demostracion. E cantidad aki no a cambia den varios aña, Sterkenburg a bisa. Un vocero di AIVD a bisa Trouw cu e menasa di derecha extremo ta chikito compara cu otro paisnan, pero cu actonan di persona solitario radicalisa como resultado di lenguahe di odio no por ser descarta.
Sterkenburg a bisa cu partidonan derechista eligi democraticamente manera PVV y FvdD ta ‘normalisa retorica di ultra- derecha cu ta deshumanisa minoria etnico. Pero no ta cla si esaki ta conduci na violencia’.
E siman aki, lider di FvdD, Thierry Baudet a ser acusa di usa lenguahe di ultra-derecha durante un debate riba e contribucion Hulandes pa Union Europeo, ora el a bisa parlamentarionan cu UE tabata promoviendo e ‘debilitamento di identidadnan nacional Europeo’ na fabor di multiculturalismo.
