Un di cada cinco persona na Latino America y Caribe ta sufri di extorsion sexual ora nan ta purba di drenta den servicio publico, un fenomeno cu ta afecta e muhenan principalmente, di acuerdo un estudio riba corupcion den e region, publica ayera pa ONG Transparencia Internacional (TI).
Di acuerdo cu conclusion di Barometro Global di Corupcion, un encuesta realisa na mas di 17.000 persona di 18 pais, un number halto di muhenan ta esunnan cu mas biaha ta forsa pa paga soborno pa servicio sanitario y educativo, ademas, 71% di e poblacion di e region a sigura cu nan sa di e situacion y nan ta reconoce cu regularmente esey ta pasa.
“Ta hopi importante studia den profundidad e vinculo entre corupcion y genero. E corupcion ta un tabu na hopi luga: discriminacion sexual, tambe. E corupcion contra muhe ta un tabu. P’esey ta importante duna espacio y visibilidad den e asunto aki. Sino, no por neutralisa”, e director ehecutivo di TI, Patricia Moreira a splica.
Barbados, Bahamas y Guatemala ta registra e mas halto nivel di incidencia di extorsion sexual na Latino America y Caribe. Di acuerdo cu TI, den e tres pais aki a observa balornan di 30%, 24% y 22%, respectivamente di personanan cu ta sigura di sufri of cu nan ta conoce un persona cu a sufri directamente.
Na Panama y Chile, paisnan cu menos a reporta, e incidencia ta yega na 14% y na Republica Dominicana y Colombia tabata di 16%. Cerca di e promedio regional, ta figura Argentina (19%), Brasil (20%) y Mexico (20%).
