Riba termino corto e maneho diario di Guarda Nos Costa y Instituto Alarma y Siguridad Aruba (IASA) lo conoce un cambio. Pa Guarda Nos Costa esaki tabata minister su pasonan tuma ora a bay pa expulsa un hoben di 15 aña di edad cual tabata bou capa di asilo politico y bou guia di Cruz Cora.
Segun minister di husticia, siguridad y integracion Andin Bikker (POR) durante fin di siman a expulsa e hoben aki cu tabata bou capa di asilo politico ‘sin consulta cu mi bureau ora mi tabata di bishita na Corsou’. Esaki segun e minister ta pone pais Aruba den un situacion dificil si mira e compromisonan cu Aruba tin cu Reino Hulandes y tambe Washington den dimension di proceduranan di asilo politico. “Nos a tuma e decision inmediato pa pone sr. Blijden como hefe di departamento den non-actief mientras nos ta investiga loke a pasa.”
Investigacion riba huymento di personanan destina pa expulsion
E stap aki minister a tuma mirando aspectonan di integridad, pero tambe pasobra te ainda no a logra resolve e problema unda personanan cu ta den proceso di deportacion varios biaha ta mira cu ta haya di un manera of otro pa scapa. “E maneho pa loke ta trata expulsion mester ta stringente pero e mester ta humano tambe. Den e aspecto humano ey mi ta haya por a consulta cu mi of mi suplente pa tuma un decision di e embergadura aki mirando cu e persona aki ta menor di edad bou capa di Cruz Cora.”
Bon Dia a haci pregunta na e minister tocante si e manera con a expulsa e persona aki lo ta relaciona cu e manera con pa personanan cu ta buscando asilo politico riba nos isla hopi biaha no tin acceso na documentacion fuera di e papel di Dimas cu ta indica cu nan caso ta den investigacion.
Nos a trece esaki dilanti na sr. Bikker su colega prome minister Evelyn Wever-Croes (MEP) algun siman atras, unda a expresa cu en caso cu un refugiado haya su mes na nos isla cu kier di sali pero sin posibilidad di haci esaki a base di falta di documentacion, gobierno lo mester investiga con pa yuda e personanan aki. ‘Pero te ainda nos no a topa cu esaki’, segun e prome minister a declara ultimo.
Minister Bikker di su banda a reacciona cu esey ta un dimension amplio te cu awo, y cu e caso aki simplemente lo ta preocupacionnan cu a bin dilanti mirando cu e hoben aki tabata bou guia di Cruz Cora.
Maneho interino anticipando riba Migracion Aruba
Alabes pa loke ta trata IASA, minister a yega na un acuerdo cu e hefe di e departamento Gerald Vingal cual a indica di kier un reto nobo, pues e persona aki su experticio lo bay den e comision di mediacion cu minister a anuncia siman pasa. Esaki manera nos a publica siman pasa lo ta un comision pa trata entre otro retrasonan cu tin na Dimas, particularmente unda pa via di ‘formalismo’ manera e minister a yega di vocifera den pasado, ta nenga cierto prolongacion di permisonan despues cu a otorga un cantidad caba.
Mirando cu IASA hunto cu Guarda Nos Costa ta den un proceso pa bay forma un instituto nobo yama Migracion Aruba, un maneho interino lo drenta na cabes di e institutonan aki cu lo bay uni, consistiendo di Trudy Hassel y Icho Matos. E management team aki lo ta temporario.
Maneho nobo reconociendo negacion di permiso pa via di ‘formalismo’
Manera ta conoci, Hulanda lo tin expectativanan pa gobierno cumpli cu e actualisacion di e ley di admision LTU despues cu segun sr. Bikker esaki no a mira ningun cambio pa 8 aña largo. Den un entrevista cu director Kathy Ruiz-Paskel di Departamento di Integracion, Maneho y Admision di Stranhero (Dimas), sra. Ruiz-Paskel a indica cu entre otro e cambio aki cu lo bay introduci ta encera tambe kita e dimension di modelo Suiso cu a keda hancra den ley aunke esaki no ta e maneho vigente pa algun tempo caba. Bon Dia a puntra sr. Bikker pa amplia riba esaki y pa duna un aclaracion riba ki tempo lo bay introduci e cambio den ley di admision.
Segun e minister encarga cu cartera di stranheria, e sistema nobo cu Dimas a adopta, esta Sirsa (Sistema di Innovacion di Registro Stranhero Aruba) ta integra cu e tecnologia avansa di Inteligencia Artificial. Esaki kiermen cu pa e sistema compronde maneho e lo mester siña di esaki ora introduci e maneho den e sistema. “Kiermen cu e sistema ta cuminsa siña cu ah, esaki ta tal caso, kiermen tal decision mester wordo tuma. Su mes ta siña. Esey ta pone cu si bo tuma un decision pa un maneho nobo diabierna ultimo, bo mester prepara den e sistema pero tambe internamente riba e cambionan.”
E maneho nobo aki cu lo cuminsa anticipa riba e cambio di ley lo inclui entre otro reconocemento di permisonan pa migrantenan altamente educa (kennismigranten) cual lo bay contribui na un pilar economico nobo ‘cu experticio specifico pa apart di turismo nos tin otro tipo di economia’, segun e minister. E ta encera tambe e reconocemento di e problematica di buraconan di permiso, of un firma liber cu Dimas ta nenga pa via di un rekisito ‘chikito’.
”Mi ta hopi contento y gradici cu conseho di minister diabierna ultimo a bay di acuerdo cu e maneho aki cu nos ta premira lo drenta na vigor riba 9 di juli venidero. Nos lo tin un conferencia di prensa separa pa splica kico lo ta e cambionan cu esaki lo encera. Y pa loke ta trata LTU nos ta trahando riba dje pa introduci esaki cu cooperacion di parlamento y Conseho Consultativo riba mas tarda 1 di oktober.”
