ORANJESTAD – Aeropuerto Internacional Reina Beatrix a organisa un evento di fotografia, unda cu participantenan por a drenta na e area unda avion ta y saca potret, y e miho a wordo poni den un exposicion riba e muraya di aeropuerto.

“Como 1 di e aeropuertonan lider den Caribe, continuamente nos ta purba crea oportunidadnan nobo pa haci nos posicion como aeropuerto mas fuerte den e industria y mantene e toke competitivo. Aunke hopi aeropuerto den Caribe ta conoci pa nan luganan specificamente asigna pa ‘plane spotting’, Aeropuerto di Aruba kier a haci algo extra pa e spotternan, door di organisa e “Official Spotter’s Day”. E ta nos honor pa premia e miho spotter cu no 1, sino 2 expo den aeropuerto. E exponan aki situa na gate 4/5 y gate 2 ta yuda duna bida na aviacion na e parti paden tambe di aeropuerto. Nos ta felicita Jean-Pierre cu su bunita coleccion di potret di Aruba su aviacion”, asina AAA su CEO Sr. James Fazio a bisa.

Oficial di comunicacion y PR di aeropuerto, Hendrick Croes ta bisa cu a organisa e prome Spotter Day dia 11 augustus, unda cu diferente unit a traha hunto pa haci evento posibel. 40 persona a aplica, pero a scoge 10 cu a haya oportunidad pa bay airside.

Prome cu por drenta e area special di spotting, mester a sigui un entrenamento di siguridad pa asina tur participante ta safe. Despues di evento, e fotografo mester a manda nan 3 miho potret ,y tur esaki a wordo poni riba rednan social pa asina votacion tuma luga.

Despues di e votacion, Jean- Pierre Maduro a resulta e miho ‘spotter’, y awo por mira un exposicion cu su potretnan na aeropuerto.

CEO James Fazio a bisa ora e team di aeropuerto a bin cu idea, el a gust’e. E ta bisa cu e fotografo ta reconoce cu a hasta bay den mata pa asina captura e miho momento pa por bin cune dilanti pa nan proyecto.

“E team a bin cu idea pa asina bay mas cerca di nan. Nos tin persona talentoso cu ta saca bunita potret. Mi ta felicita sr. Maduro pa su trabou excelente den fotografia y hende cu a vota. Aeropuerto ta un luga cu ta constantemente ta ocupa, anto e potret ta captura e energia di nos aeropuerto. Nos lo tin miyones di persona cu ta biaha, nan lo pasa y wak e murayanan aki, pa nan por wak nos talento local.”

Maduro a splica cu e proyecto aki tabata algo cu e tabata desea, pa mustra su potret den aeropuerto. “Ora cu Hendrik a organisa esaki, tabata algo cu tabata spera di basta tempo y por a saca potret di cerca.” Maduro ta bisa cu dia nan a logra, e tabata un momento special pa por haci e. Su inspiracion ta aviacion. E ta remarca cu for di chikito, e tabata biaha cu su mama y el a gusta fotografia.

“Mi tabata creativo den haci e shot. Mi ta purba haci cosnan apart y trece potret cu mi no ta wak tur dia di avion, principalmente na Aruba algo cu no ta wordo haci. Awendia bo no ta wak di aviacion, esey ta motibo pakico mi ta haci e tipo di fotografia aki. Algo cu a haci ami contento ta pasa henter un dia na aeropuerto, sin come, sin worry, djis saca potret drumi riba vloer, djis pa logra e shot perfecto; e ta algo cu mi gusta haci”, Maduro a splica.

E potret ganado, cu ta esun di avion KLM den e cristal, hunto cu otro 9 a wordo scogi pa su exposicion. Pa finalisa, Croes a splica cu inscripcion pa ‘Spotters Day’ ta habri, y hende por wak riba rednan social. Pa e aña ki lo tin oportunidad pa ‘spotters’ internacional cu lo mustra kico ta aviacion. Despues nan lo scoge e 10 miho spotters pa 2019.

[maxgallery id=”37892″]