Dialuna ultimo, cu e presencia di un Lama cu a bin directamente for di Tibet pa Aruba, a keda inaugura un exposicion den sala chikito di Biblioteca Nacional Aruba (BNA), den cuadro di Dia Mundial di Diversidad Cultural pa Dialogo y Desaroyo.
E tabata un actividad organisa pa e gestor cultural, Mirto Laclé y su casa, Jennifer Laclé-Boezem, cu sosten di BNA y Departamento di Cultura.
E anochi aki a bira uno special ya cu e cantante y filantropico, Edjean Semeleer a ricibi un homenahe y reconocimento pa su trayectoria musical di 25 aña den mundo musical y di entretenimento. Igualmente, e hobencitonan cu a bay representa Aruba den Arte di Palabra ABC, Samantha Garcia Guevara y Obi Tromp tambe a haya oportunidad pa declama nan poesianan. E hoben musico y pianista Igmar Maduro a deleita e publico presente cu tres piesa riba piano: Dalia, Arubianita y Pariba di Cas.
Exposicion
E presencia di e Lama, Geshe-la Chamba, tabata un iniciativa di Hans Timpner pa asina duna contenido na e Dia Mundial di Diversidad Cultural pa Dialogo y Desaroyo. E exposicion interesante cu ta habri pa publico den orario di BNA ta relaciona cu e tema di misticismo. Tur hende ta cordialmente bonbini.
