Recientemente na nos mesa di redaccion a yega mas informacion tocante e rumornan contra director di Dr. Horacio Oduber Hospital. Tambe tin rumor di malconducta di e Hunta Directiva. Ciudadanonan ta keda bin dilanti pa comparti nan experiencia riba esaki. Mientras tanto, minister di Salud, Dangui Oduber a indica na Bon Dia Aruba cu e tin confiansa cu e Hunta di Supervision lo ta manehando e situacion.

Cu e titulo ‘Exposicion di abuso: E crisis na HOH y un yamada pa accion’, un informante anonimo a expresa su opinion riba e situacion aki:

Revelacionnan recien, incluyendo e carta di anestesiologo Dr. Ike Posner tocante e retiro di Dr. Babet Latour y e publicacion den Bon Dia Aruba riba dia 27 y 28 di augustus, a trece na luz hechonan shockeante tocante un situacion interno preocupante dentro di e institucion.

Imagen distorsiona den medionan di comunicacion
 Medionan di Comunicacion consistentemente ta mustra HOH den luz positivo como un excelente dunador di trabao bao liderazgo di Jacco Vroegop y Gregory Croeze. Frecuentemente ta mira publicacionnan tocante celebracionnan di empleado di luna y colaboracionnan internacional. Un articulo recien a menciona e retiro di varios ginecologo, incluyendo Dr. Latour, como un stap na caminda pa desaroyo profesional. Sinembargo, tras di e fachada aki tin un realidad scur cu no por atribui solamente na director di hospital sino tambe na miembro di Hunta Directiva, Gregory Croeze, kende ta involucra den tur e malconducta dentro di e institucion.

E testimonio recien di Dr. Posner y e publicacionnan anonimo ta duna un bista sin filter di e situacion precario dentro di HOH. No solamente dokternan ta confronta cu intimidacion personal y profesional di e Hunta Directiva, sino cu varios empleado cualifica ta haya nan mes obliga pa retira di un manera brutal.

Otronan a bandona e organisacion boluntariamente pa motibo di e comportamento inapropiado aki. Ademas, tras di cortina, ta entregando varios demanda pa victimisa empleadonan, un tactica usa pa e Hunta Directiva pa forsa retiro inhusto di empleadonan critico cu ta mustra nan fayonan y maneho fracasa.

Estado perturbador y abuso di poder

E conductanan alarmante aki a conduci na un deterioro preocupante den e cuido disponible na hospital riba e isla. Un escasez di personal cualifica y motiva, instabilidad interno dentro di HOH, desgaste significativo di empleadonan hunto cu problemanan andando cu proyectonan di construccion y e costo halto di consultant externo, tur ta contribui na empeora e situacion. E politica fracasa y maneho deficiente aki ta laga cla cu tin fayonan fundamental den varios aña, cu ta costa tanto e pashentnan como e poblacion di Aruba.

Transparencia y responsabilidad

Minister di Salubridad Publico, Dangui Oduber ta enfatisa den e publicacion di Bon Dia Aruba riba dia 28 di augustus cu tur keho tocante e Hunta Directiva mester ser entrega door di e Hunta di Supervision. Sinembargo, e minister di Salud ta carga responsabilidad final pa sigura maneho efectivo den hospital y pa sigura suficiente disponibilidad medico pa poblacion di Aruba. Den otro palabra, e confiansa cu e minister t pone den e Hunta di Supervision pa cu e situacion aki ta parce di indica un falta di comprension di e situacion.

Adicionalmente ta importante pa e Hunta di Supervision, gobierno di Aruba y autoridadnan relevante para responsable pa e siutacion actual y nan contribucionnan na e problemanan andando. A pesar cu a trece preocupacion ripiti cerca e Hunta di Supervision, accion concreto ta keda ausente. Pa loke ta e rol di sindicato di hospital (ABV) relaciona cu e empleadonan afecta, con esaki ta cay aden?

Investigacion independiente
 Un investigacion completo y independiente mester tuma lugar riba e mal practica y mal conducta dentro di HOH pa asina por haya sa e magnitud exacto di e problema y formula accionnan concreto.

Mehora condicion di trabao
 Mirando e kehonan andando cu a bin dilanti den medionan di comunicacion recientemente, tambe mester duna prioridad na crea un ambiente di trabao cu ta safe y ta duna sosten na empleadonan pa asina continua dunando cuido di calidad halto pa pashentnan di HOH.

Yamada urgente pa cambio
 No por ignora e revelacionnan aki. Tanto e salud di poblacion di Aruba y e integridad di cuido di salud, como tambe e seguridad di empleadonan, ta den riesgo. Ta keda na e partidonan involucra y pa gobierno pa tuma accion inmediato y lucha pa un sistema di cuido di salud cu ta sostene e standardnan mas halto di cuido y etica, unda conflicto di interes, victimisacion di ciudadanonan y faboritismo no mester hunga un rol.

Reaccion di hospital
 Mirando e seriedad di e acusacionnan, Bon Dia Aruba a tuma contacto cu PR di HOH, pa puntra si nan a ricibi kehonan oficial tocante e malconducta di director di Hospital. Tambe Bon Dia Aruba a puntra si ta berdad cu nan a entama demanda contra algun empleado of ex-empleado.

HOH a contesta cu “no tin ningun keho cu a ser entrega contra di Hunta di Directiva ni tampoco contra director di HOH mes.

“Pa loke ta e pregunta di keho contra empleado den forma di intimidacion di parti di Hunta di Directiva, ta trata di casonan interno. Mescos cu nos semper ta para pa privacidad di nos pashentnan, tambe nos ta para pa privacidad di nos empleadonan y pues no por duna contesta riba casonan individual.”