(MercoPress) – Disrupcion di transporte maritimo global y tambe riba riunan grandi cu ya no tin suficiente fluho di awa pa permiti barconan nabega, ta menasa e exportacion di carni for di paisnan di Conosur, esta paisnan cu ta forma parti di e union Mercosur, cu ta inclui Brazil, Uruguay y Paraguay. Tur esaki mientras cu prijs pa comodidad di cuminda ta aumentando rond mundo.
E problema ta mas grandi pa Paraguay, cu no tin ningun acceso directo pa lama. Na e pais ey, actividadnan di abattoir ta proyecta di lo cay cu 20 pa 25 porciento. E causa principal ta falta di container, e aumento den gasto di transporte y insiguridad riba fechanan cu por entrega e producto, segun Presidente di e Camara di Carni di Paraguay, Korni Pauls.
E empresario Paraguayo a duna e comentario aki despues cu abattoirnan di Uruguay a saca un relato di prensa cu e advertencia cu produccion di carni lo ta limita e luna aki, pa motibo cu carni di Uruguay mester bay den freezer. Motibo ta cu barconan di container ta evita e waf di Montevideo pa puerto y cargonan mas lucrativo. Algun abattoir na Uruguay ta mandando nan producto den containernan transporta riba careteranan pa puertonan na sur di Brazil, y hasta na Valparaiso, Chile.
Pauls a admiti cu desde algun siman, algun abattoir ta manda nan carni pa puertonan na Brazil, manera Santos y Paranaguá, pero e costonan ta exorbitante. El a sigui splica cu Paraguay ta menos dependiente riba transporte maritimo pa su exportacion, ya cu 45 porciento di su productonan ta sali den trucknan refrigera pa Brazil, Chile y Uruguay. E situacion pa Uruguay ta mas problematico, ya cu su mercadonan principal ta Hong Kong y China. Pero, e volumennan di carni di Paraguay cu por transporta riba e riu Parana ta costa como 30 porciento mas, pa motibo cu e fluho di awa den e riu a baha hopi pa secura historico cu ta stroba nabegacion.
Uruguay y Paraguay ta entre e seis exportador di carni mas grandi di mundo.
Ni Brazil ta scapa di e situacion. E exportado principal di carni y galiña ta acumulando volumennan den almacennan friu mirando cu no tin suficiente container refrigera na e momentonan aki.
